ក្រុមប្រឹក្សាប្រតិបត្តិរបស់ IMF បានអនុម័តថវិកាសង្គ្រោះប្រហែល៣ពាន់លានដុល្លារសម្រាប់ស្រីលង្កា។ ស្រីលង្កានឹងទទួលបានជំនួយដំណាក់កាលដំបូងជាមួយទឹកប្រាក់៣៣០លាន​ដុល្លារ​។ នេះបើតាម​ការ​បញ្ជាក់របស់មន្ត្រី IMF។

 

ក្នុងសេចក្តីថ្លែងការណ៍មួយ IMF បញ្ជាក់ថា កម្មវិធីសង្រ្គោះនឹងជំរុញការគាំទ្រពីខាងក្រៅបន្ថែម​ទៀតសម្រាប់ស្រីលង្កា​ជាមួយនឹងការផ្តល់មូលនិធិពីធនាគារពិភពលោកនិងធនាគារអភិវឌ្ឍន៍អាស៊ីដល់ទៅចំនួន​៣,៧៥​ពាន់​លានដុល្លារ។

 

លោក Peter Breuer ប្រធានបេសកកម្មជាន់ខ្ពស់សម្រាប់ស្រីលង្កាប្រចាំនាយកដ្ឋានអាស៊ី និង​ប៉ាស៊ីហ្វិករបស់ IMF បាននិយាយថា និរន្តរភាពបំណុលគឺជាលក្ខណៈវិនិច្ឆ័យសំខាន់មួយសម្រាប់ IMF ដើម្បីអនុម័តថវិកាសង្គ្រោះសម្រាប់សេដ្ឋកិច្ចណាមួយ។

 

គួរបញ្ជាក់ថា ការគ្រប់គ្រងសេដ្ឋកិច្ចមិនត្រឹមត្រូវគួបផ្សំនឹងផលប៉ះពាល់នៃជំងឺកូវីដ-១៩ បានធ្វើឱ្យ​ស្រីលង្កាខ្វះខាតប្រាក់ដុល្លារយ៉ាងធ្ងន់ធ្ងរសម្រាប់ការនាំចូលសំខាន់ៗនៅដើមឆ្នាំមុន។ វិបត្តិនេះក៏ធ្វើឱ្យ​ប្រទេសមួយនេះធ្លាក់ចូលក្នុងវិបត្តិហិរញ្ញវត្ថុដ៏អាក្រក់បំផុតក្នុងរយៈពេលប្រាំពីរទសវត្សរ៍៕