ស្របគ្នានឹងក្ដីបារម្ភចំពោះបញ្ហាសមុទ្រចិនខាងត្បូង ហ្វីលីពីន​ក៏អនុញ្ញាតឱ្យអាម៉េរិកប្រើប្រាស់មូលដ្ឋានយោធ៤ទៀតបន្ថែមពីលើការចូលប្រើមូលដ្ឋាន៥រួចហើយនោះ។ 

 

«មូលដ្ឋានបន្ថែមចំនួន៤ រាយប៉ាយនៅជុំវិញហ្វីលីពីន ហើយខ្លះមាននៅភាគខាងជើង ខ្លះនៅជុំវិញខេត្ត Palawan ខ្លះទៀតមាននៅភាគខាងត្បូង»។ លោក Marcos ប្រាប់​អ្នកសារព័ត៌មាន​បែប​នេះ​អំឡុងការរំលឹកខួបការបង្កើតកងទ័ពហ្វីលីពីន។ 

 

ក្រោមកិច្ចព្រមព្រៀង EDCA ហ្វីលីពីនអនុញ្ញាតឱ្យអាមេរិកចូលទៅកាន់មូលដ្ឋានរបស់ខ្លួនសម្រាប់ការ ហ្វឹកហ្វឺនរួមគ្នា ការកសាងគ្រឿងបរិក្ខារដូចជាផ្លូវហោះហើរ កន្លែងផ្ទុកប្រេងឥន្ធនៈ និង​លំនៅដ្ឋាន​យោធា ប៉ុន្តែមិនមែនជាវត្តមានអចិន្ត្រៃយ៍នោះទេ។

 

លោក Marcos Jr. និយាយទៀតថា ហ្វីលីពីននិងអាមេរិកនឹងប្រកាសអំពីទីតាំងមូលដ្ឋាន​ទ័ព​នា​ពេល​ឆាប់ៗនេះ ដែលវាជំរុញសមត្ថភាពរបស់ហ្វីលីពីនក្នុងការការពារផ្នែកខាងកើតនៃកោះ Luzon ដ៏​ធំ​បំផុតរបស់ខ្លួន។ កោះ Luzon មានទីតាំងនៅជិតកោះតៃវ៉ាន់បំផុត។

 

ទាក់ទងរឿងនេះ ក្រសួងការបរទេសចិនបានរំលឹក​ឡើងវិញពីជំហររបស់ខ្លួនថា ភាគីអាមេរិក​កំពុ​ង​បង្កើនភាពតានតឹងដោយការពង្រឹងការដាក់ពង្រាយយោធានៅក្នុងតំបន់ ហើយប្រាប់ប្រទេសនានា​គួរ​តែប្រុងប្រយ័ត្ន និងជៀសវាងការត្រូវបានប្រើប្រាស់ដោយអាមេរិក។

 

«ជាទូទៅយើងជឿថាកិច្ចសហប្រតិបត្តិការលើវិស័យការពារជាតិរវាងប្រទេសនានាគួរតែអំណោយផលដល់សន្តិភាព និងស្ថិរភាពក្នុងតំបន់ ហើយមិនគួរមានគោលបំណងទៅលើភាគីទីបី ឬ​ប៉ះ​ពាល់​ផល​ប្រយោជន៍របស់ភាគីទីបីឡើយ»។ អ្នកនាំពាក្យក្រសួងការបរទេសចិនលោក Wang Wenbin សង្កត់ធ្ងន់បែបនេះក្នុងសន្និសីទសារព័ត៌មានប្រចាំថ្ងៃទី២២ ខែមីនា។

 

ថ្លែងនៅចំពោះមុខកងទ័ពហ្វីលីពីន លោក Marcos Jr. ក៏បញ្ជាក់ពីភាពចាំបាច់ឱ្យមានការប្រុងប្រយ័ត្ន ខណៈដែលការគំរាមកំហែងពីខាងក្រៅចំពោះសន្តិសុខជាតិកាន់តែស្មុគស្មាញ និងមិនអាចទាយទុក​មុនបាន៕