ជុំវិញការប្រែប្រួលចុងក្រោយរវាងតៃវ៉ាន់ និងហុងឌូរ៉ាស អាម៉េរិកក៏ចេញមុខព្រមានប្រទេសទ្វីបអាម៉េរិកមួយនេះដែរ។

 

«ដោយមិនគិតពីការសម្រេចចិត្តរបស់ហុងឌូរ៉ាស អាម៉េរិក នឹងបន្តធ្វើឱ្យស៊ីជម្រៅ និងពង្រីកទំនាក់ទំនងរបស់យើងជាមួយតៃវ៉ាន់ស្របតាមគោលនយោបាយចិនតែមួយរបស់យើងដែលមានរយៈពេលយូរ»។ នេះបើតាមអ្នកនាំពាក្យវិទ្យាស្ថានអាម៉េរិក នៅតៃវ៉ាន់ ដែលជាស្ថានទូតអាម៉េរិកនៅទីក្រុងតៃប៉ិ។

 

បើតាមអ្នកនាំពាក្យដដែល អាម៉េរិកលើកទឹកចិត្តយ៉ាងមុតមាំឱ្យប្រទេសទាំងអស់ពង្រីកការចូលរួមជាមួយតៃវ៉ាន់ និងបន្តឈរលើជំហរផ្នែកប្រជាធិបតេយ្យ អភិបាលកិច្ចល្អ តម្លាភាព និងការប្រកាន់ខ្ជាប់នីតិរដ្ឋ។

 

ក្នុងករណីហុងឌូរ៉ាសភ្ជាប់ទំនាក់ទំនងជាមួយចិន តៃវ៉ាន់នឹងនៅសល់ទំនាក់ទំនងផ្លូវការជាមួយប្រទេស១៣ទៀតប៉ុណ្ណោះ ដែលសុទ្ធសឹងជាប្រទេសក្រីក្រ និងប្រទេសកោះ៕