កីឡាករប្រដាល់គុនខ្មែរ ធីម សៀងហៃ  បានយកឈ្នះកីឡាករបារាំង កាលីត កាស៊ីម៉ិ ដោយពិន្ទុលើប្រភេទទម្ងន់ ៥៤គីឡូក្រាម ក្នុងកម្មវិធីប្រកួត King Gloves។ ការទទួលបានជ័យជម្នះនេះដែរគ្រូប្រដាល់វ័យក្មេងចិត្តស៊ូ ធីម សៀងហៃ ប្រាប់ពីមូលដ្ឋានគ្រឹះដែលនាំឱ្យខ្លួនទទួលបានជោគជ័យក្នុងការប្រកួតនោះផងដែរ។

 

«ការប្រកួតរបស់យើងយូរៗវាយម្តងវាមិនរហ័សរហួនទេ។ ការប្រកួតរបស់យើងត្រូវស្មឹងស្មាធ ពេលវាយកុំមានចិត្តឆេវឆាវ បើយើងឆេវឆាវនោះនឹងឆាប់ខ្សោយកម្លាំង»។ គ្រូប្រដាល់វ័យ២៤ឆ្នាំ ប្រាប់ដូច្នេះ។

 

សៀងហៃ ដែលមានដើមកំណើតនៅខេត្តកោះកុង មានប្រវត្តិប្រកួតលើសង្វៀនទឹកដីត្រជាក់នាប្រទេសបារាំង ៤លើកមកហើយដោយឈ្នះ៣ និងចាញ់១។ សម្រាប់ទម្ងន់ ៥៤គីឡូក្រាម សៀងហៃ បានជាប់ជាកីឡាករដែលស្ថិតក្នុងរង្វង់ AFMT Ranking Classes A 2022 ផងដែរ។

 

គួបញ្ជាក់ថា គ្រូប្រដាល់គុនខ្មែរវ័យក្មេង ធីម សៀងហៃ បានទៅរស់នៅ និងបង្វឹកសិស្សគុននៅក្លិបប្រដាល់នៅប្រទេសបារាំង រយៈពេលបួនឆ្នាំហើយ គិតត្រឹមឆ្នាំ២០២៣នេះ៕