កម្មវិធីចាប់ឆ្នោតរើសពូលការប្រកួតពានរង្វាន់កីឡាបាល់ទាត់ FIFA World Cup ក្រោមអាយុ២០ឆ្នាំ ដែលនឹងធ្វើឡើងនៅកោះបាលី ប្រទេសឥណ្ឌូណេស៊ី សប្តាហ៍ក្រោយត្រូវពន្យារពេល ក្រោយមានការតវ៉ាពីអ្នកគាំទ្រឥណ្ឌូណេស៊ី ដោយសារវត្តមានរបស់ក្រុមអ៊ីស្រាអែល។ បើតាមការចុះផ្សាយរបស់ទីភ្នាក់ងារសារព័ត៌មាន Reuters រដ្ឋបាលកោះបាលីក៏បដិសេធមិនទទួលក្រុមអ៊ីស្រាអែលឱ្យចូលប្រកួតដែរ។
បើតាមសហព័ន្ធបាល់ទាត់ឥណ្ឌូណេស៊ី (PSSI) ការចាប់ឆ្នោតរើសពូល នឹងត្រូវធ្វើឡើងតាមកាលបរិច្ឆេទនៅថ្ងៃទី២៤ មីនា ប៉ុន្តែត្រូវបានលុបចោលវិញ។ មូលហេតុនៃការលុបចោល និងលើកពេល ព្រោះតែសហព័ន្ធបាល់ទាត់អន្តរជាតិ (FIFA) នៅត្រួតពិនិត្យលើការត្រៀមខ្លួនរបស់ម្ចាស់ផ្ទះឥណ្ឌូណេស៊ីឡើងវិញ ដ្បិតមានរឿងចម្រូងចម្រាសរវាងម្ចាស់ផ្ទះ និងក្រុមអ៊ីស្រាអែល។
ក្រុម U-22 អ៊ីស្រាអែល ជាក្រុមស្ថិតក្នុងចំណោមក្រុមទាំង២៤ ត្រូវប្រកួតក្នុងព្រឹត្តិការណ៍ U20 World Cup ដែលធ្វើឡើងចាប់ពីថ្ងៃទី២០ ខែឧសភា ដល់ថ្ងៃទី១១ ខែមិថុនា ឆ្នាំ២០២៣។ ការប្រកួតនឹងធ្វើឡើងក្នុងទីក្រុងចំនួន៦ ក្នុងប្រទេសឥណ្ឌូណេស៊ី ស្របពេលអ៊ីស្រាអែលនឹងត្រូវបង្ហាញខ្លួនលើកដំបូងក្នុងការប្រកួតនេះដែរ។
បើតាមរបាយការណ៍របស់កាសែត Jakarta Post កាលពីដើមខែមីនា រដ្ឋបាលកោះបាលី លោក Wayan Koster បានសរសេរសំណើរទៅកាន់ក្រសួងយុវជន និងកីឡា ទាមទារអនុម័តគោលការណ៍ហាមប្រាមក្រុមអ៊ីស្រាអែលមិនឱ្យចូលមកប្រកួតនៅក្នុងកោះបាលីឡើយ។ ការទាមទារនេះក៏ព្រោះតែមូលហេតុ ជម្លោះរវាងអ៊ីស្រាអែលជាមួយប៉ាឡេស្ទីន។ សំណើរពីសំណាក់រដ្ឋបាលកោះបាលីនេះ ក៏បានផ្ញើទៅកាន់ PSSI ដូចគ្នាដែរ។
«កាលពីមុនមក រដ្ឋបាលកោះបាលីលោក Wayan Koster បានបដិសេធចំពោះវត្តមានក្រុមអ៊ីស្រាអែលអាយុក្រោម ២០ឆ្នាំ ក្នុងការប្រកួត World Cup នេះ។ នេះអាចជាហេតុផលសម្រាប់ FIFA ដែលលុបចោលការចាប់ឆ្នោតការប្រកួត U20 World Cup នេះ។»។ PSSI បាននិយាយក្នុងសេចក្តីថ្លែងការណ៍បែបនេះ។
បើតាម PSSI បានបញ្ជាក់ថា សម្រាប់ FIFA ការបដិសេធរបស់អភិបាលខេត្ត គឺដូចគ្នាទៅនឹងការលុបចោលការធានារៀបចំកម្មវិធីដែលត្រូវបានចេញដោយរដ្ឋបាលខេត្តបាលីអ៊ីចឹងដែរ។
ការតវ៉ានេះមិនត្រឹមតែធ្ចើឡើយដោយគណៈគ្រប់គ្រងខេត្តបាលីប៉ុណ្ណោះទេ។ កាលពីដើមខែមីនា ក្រុមបាតុករបានប្រមូលផ្តុំគ្នាក្នុងទីក្រុងហ្សាការតា លើកទង់ជាតិឥណ្ឌូណេស៊ី និងទង់ប៉ាឡេស្ទីន ខណៈទាមទារមិនឱ្យអ៊ីស្រាអែលចូលរួមការប្រកួតនៅទឹកដីខ្លួន។
ទោះបីជាយ៉ាងណា PSSI មានការព្រួយបារម្ភចំពោះបញ្ហានៃការតវ៉ា ខណៈខ្លួនមិនចង់ឱ្យបាត់បង់ឱកាសសិទ្ធិធ្វើជាម្ចាស់ផ្ទះពេលបច្ចុប្បន្ន និងអនាគត ហើយនេះ ក៏នឹងប៉ះពាល់ដល់អនាគតវិស័យបាល់ទាត់ឥណ្ឌូណេស៊ីផងដែរ។
ប្រទេសឥណ្ឌូណេស៊ីក៏កំពុងតែព្យាយាមកសាងឡើងវិញនូវកេរ្តិ៍ឈ្មោះ បន្ទាប់ពីហេតុការណ៍រត់ជាន់គ្នាក្នុងកីឡដ្ឋានកាលពីឆ្នាំមុន ដែលបណ្តាលឱ្យមានមនុស្សស្លាប់ប្រមាណ ១៣៥នាក់ នាខេត្តជ្វាខាងកើត៕