ពិធីចូលឆ្នាំបន្ទាយឆ្មារ នឹងរៀបចំកម្មវីធីកម្សាន្តជាច្រើនដូចជា  ការប្រគុំតន្រ្តីស្គរដៃ ការលេងល្បែងប្រជាប្រិយ៍ ការបណ្ដែតប្រទីប-គោម ការប្រកួតគុណល្បុកតោ ការតាំងពិពណ៌ពាណិជ្ជកម្ម បន្ទាយឆ្មារត្រជាក់ចិត្ត និងការប្រគុំតន្រ្តីសម័យ។ ក្រៅពីនេះ ក៏មានការរៀបចំពិធីសាសនាមួយចំនួនដូចជា ពិធីពូនភ្នំខ្សាច់ ស្រង់ព្រះ និងទស្សនីយភាពល្ខោនខោល។
  

នេះជាលើកទី១ហើយ ដែលក្រុមការងារអភិវឌ្ឍន៍យុវជនខេត្តបន្ទាយមានជ័យ សហការជាមួយរដ្ឋបាលខេត្ត និងសហភាពសហព័ន្ធយុវជនកម្ពុជា រៀបចំពិធីចូលឆ្នាំនេះឡើង ក្នុងបរិវេណប្រាសាទបុរាណ។ កាលពីឆ្នាំ២០២០ ក្រុមការងារក៏គ្រោងនឹងរៀបចំដែរ ប៉ុន្តែដោយសារការរាលដាលជំងឺកូវីដ-១៩ ក៏ត្រូវខកខានរៀបចំវិញ។

 

ក្រុមការងារអភិវឌ្ឍន៍យុវជនខេត្តបន្ទាយមានជ័យ រៀបចំកម្មវិធីនេះឡើង ដើម្បីផ្ដល់បរិយាកាសសប្បាយរីករាយ ការជុំជួប និងទិដ្ឋភាពកម្សាន្តប្លែកសម្រាប់ពលរដ្ឋខេត្តបន្ទាយមានជ័យ និងភ្ញៀវទេសចរនាឱកាសពិធីចូលឆ្នាំខ្មែរប្រពៃណីជាតិនេះ៕