ក្នុងសន្និសីទសារព័ត៌មាន «ភាពជោគជ័យក្នុងរយៈពេល ៥ឆ្នាំកន្លងមករបស់ខេត្តបន្ទាយមានជ័យ» នៅថ្ងៃទី២៨ មីនា លោក អ៊ុំ រាត្រី អភិបាលខេត្តបន្ទាយមានជ័យ បានឱ្យដឹងថា ក្នុងចំណោមប្រជាពលរដ្ឋ ៨០ម៉ឺននាក់ ក្នុងខេត្ត គឺមានពលរដ្ឋ ៨៥ភាគរយ ជាកសិករ។ ដោយឡែក ១០ភាគរយ ជាអាជីវករ និងពាណិជ្ជករ និង៥ ភាគរយ ប្រកបរបរផ្សេងៗ។

បើតាមអភិបាលខេត្តរូបនេះ ខេត្តមានប្រព័ន្ធធារាសាស្រ្តចំនួន ៨៧ប្រព័ន្ធ ដែលអាចស្រោចស្រពលើផ្ទៃដីជាង ៦ម៉ឺនហិកតា។ នៅខេត្តបន្ទាយមានជ័យ ផ្ទៃដីដាំស្រូវមានជាង ៣០ម៉ឺនហិកតា ដែលអាចប្រមូលផលបានចន្លោះពី៩សែនទៅ១លានតោនក្នុងមួយឆ្នាំ។ 
 

ក្រៅពីដំណាំស្រូវ ដំណាំឧស្សាហកម្មវិញ ក៏មានកំណើនច្រើនផងដែរ។ លោក អ៊ុំ រាត្រី បន្តថា ផ្ទៃដីដាំដំណាំឧស្សាហកម្មមានជាង ១២ម៉ឺនហិកតា ក្នុងនោះ ដំឡូងមីមានជាង ១០ម៉ឺនហិកតា, ស្វាយចន្ទីជាង ៣ពាន់ហិកតា, ពោតក្រហម ជាង ១ម៉ឺនហិកតា និងដំណាំផ្សេងៗទៀត។ 
  

ដោយឡែក ការអភិវឌ្ឍវារីវប្បកម្មវិញ ក្នុងរយៈពេល ៥ឆ្នាំនេះ ផលនេសាទទទួលបានជាង ១៣ម៉ឺនតោន ដោយបានកែច្នៃសម្រាប់នាំចេញបានជាង ២ពាន់តោនផងដែរ។ ចំពោះការចិញ្ចឹមសត្វ ខេត្តបន្ទាយមានជ័យ មានកសិដ្ឋានចិញ្ចឹមសត្វលក្ខណៈពាណិជ្ជកម្ម មានចំនួន ៨៣កសិដ្ឋាន ក្នុងនោះគោ មានចំនួន ១៤កសិដ្ឋាន, ជ្រូក មាន២០កសិដ្ឋាន និងបក្សី មានចំនួន ៤៩កសិដ្ឋាន។

 

សូមបញ្ជាក់ថា បច្ចុប្បន្នខេត្តបន្ទាយមានជ័យ មានសហគមន៍កសិកម្ម ចំនួន ៤៩សហគមន៍, សហគមន៍នេសាទ ១៩សហគមន៍ និងសហគមន៍ព្រៃឈើ ចំនួន ៩ សហគមន៍។ នេះបើតាមលោក អ៊ុំ រាត្រី អភិបាលខេត្តបន្ទាយមានជ័យ៕