អន្តរជាតិ
វិមានក្រេមឡាំងថាគ្មានសិទ្ធផ្តល់យោបល់លើទស្សនកិច្ចរបស់ប្រធានាធិបតីចិននៅអ៊ុយក្រែនឡើយ លោក Dmitry Peskov អ្នកនាំពាក្យវិមានក្រេមឡាំង។ រូបភាព AFP
× វិមានក្រេមឡាំង នៅថ្ងៃទី២៩ ខែមីនា បានលើកឡើងថា វាមិនអាស្រ័យលើរុស្ស៊ីក្នុងការផ្តល់ យោបល់ដល់ប្រធានាធិបតីចិន លោកស៊ី ជីនភីង ដើម្បីធ្វើដំណើរទស្សនកិច្ចនៅ អ៊ុយក្រែនឬយ៉ាងណាឡើយ។
សារព័ត៌មាន Associated Press បានចុះផ្សាយថា ប្រធានាធិបតីអ៊ុយក្រែន លោកវ្ល៉ូឌីមៀ ហ្សេលេនស្គីបានបន្តអញ្ជើញមេដឹកនាំចិន លោកស៊ី ជិនភីង ដើម្បីបំពេញទស្សនកិច្ចទៅកាន់អ៊ុយក្រែន ក្រោយធ្លាប់បានសង្កត់ធ្ងន់ឱ្យចិនចូលរួមកសាងសន្តិភាពអ៊ុយក្រែន និងដើម្បីបញ្ចប់សង្គ្រាម អ៊ុយក្រែនដែលកំពុងបន្តអូសបន្លាយ។
«យើងដឹងពីជំហរមានតុល្យភាពរបស់ចិន យើងឱ្យតម្លៃវាខ្ពស់ ហើយយើងជឿថា មេដឹកនាំចិន ធ្វើការសម្រេចចិត្តដោយខ្លួនឯងលើភាពរហ័សរហួននៃទំនាក់ទំនងជាក់លាក់។ យើងមិនមានសិទ្ធិផ្តល់ដំបូន្មានណាមួយនៅទីនេះទេ»។ អ្នកនាំពាក្យវិមានក្រេមឡាំង លោក Dmitry Peskov បានសង្កត់ធ្ងន់បែបនេះ។
នៅសប្តាហ៍មុន ប្រធានាធិបតីចិន បានធ្វើទស្សនកិច្ចនៅទីក្រុងមូស្គូលើកដំបូងចាប់តាំងពីកាន់តំណែងប្រធានាធិបតីនៅអាណត្តិទី៣ ហើយរុស្ស៊ី បានគាំទ្រសំណើរបស់ចិនចំនួន១២ចំណុចសម្រាប់ការសន្ទនា និងស្វែងរកសន្តិភាពនៅអ៊ុយក្រែន។
អ៊ុយក្រែនបានស្វាគមន៍ការចូលរួមការទូតរបស់ចិន ប៉ុន្តែលោកហ្សេលេនស្គី បាននិយាយថា លោកនឹងពិចារណាតែដំណោះស្រាយសន្តិភាព បន្ទាប់ពីទាហានរុស្ស៊ីចាកចេញពីទឹកដីអ៊ុយក្រែនប៉ុណ្ណោះ៕
Tag:
រុស្ស៊ី
ចិន
អ៊ុយក្រែន
© រក្សាសិទ្ធិដោយ thmeythmey.com