លោក អ៊ូអិណុ អាត់ស៊ូស៊ី ឯកអគ្គរាជទូតជប៉ុនប្រចាំកម្ពុជា បានចុះហត្ថលេខាលើឯកសារផ្តល់ជំនួយឥតសំណង ស្ដីពីគម្រោងសន្តិសុខមនុស្សជាតិ គូសាណូណិ ទៅឱ្យគិលានដ្ឋានមិត្តភាពកម្ពុជា-វៀតណាម។ កម្មវិធីផ្ដល់ជំនួយនេះ មានលោក អ៊ុក សីហា មេបញ្ជាការរងកងទ័ពជើងទឹកនៅមូលដ្ឋានសមុទ្ររាម និងលោក ឡី សារិទ្ធ នាយកគិលានដ្ឋានមិត្តភាពកម្ពុជា-វៀតណាម បានចូលរួមកាលពីថ្ងៃទី២៨មីនា ឆ្នាំ២០២៣។ 

 

បើតាមព័ត៌មានពីស្ថានទូតជប៉ុន រដ្ឋាភិបាលជប៉ុនផ្តល់ថវិកាចំនួន១៦៦ ៨៣៧ ដុល្លារ សម្រាប់ការធ្វើលទ្ធកម្មរថយន្តសង្គ្រោះបន្ទាន់និងរថយន្តពន្លត់អគ្គិភ័យដែលប្រើប្រាស់រួច ដល់គិលានដ្ឋានមិត្តភាពកម្ពុជា-វៀតណាម។ តាមរយៈការផ្តល់រថយន្តសង្គ្រោះបន្ទាន់ចំនួន២គ្រឿង និងរថយន្តពន្លត់អគ្គិភ័យចំនួន២គ្រឿងនេះ ជប៉ុនរំពឹងថា គិលានដ្ឋានអាច បញ្ចូនអ្នកជំងឺសង្គ្រោះបន្ទាន់ទៅព្យាបាលបានច្រើននាក់ជាងមុន។ ជាមួយគ្នាដែរ រថយន្តក៏អាចពន្លត់អគ្គិភ័យធំៗ និងភ្លើងឆេះព្រៃផងដែរ។ លើសពីនេះ គម្រោងខាងលើ នឹងចូលរួមចំណែកក្នុងការធានាសុវត្ថិភាពដល់ប្រជាជនប្រមាណ២ម៉ឺននាក់ ដែលរស់នៅក្បែរគិលានដ្ឋាន។

 

ឯកអគ្គរាជទូតជប៉ុនប្រចាំកម្ពុជាអះអាងថា ជប៉ុននឹងបន្តចូលរួមចំណែកក្នុងការដោះស្រាយបញ្ហាប្រឈមនៅកម្ពុជា  តាមរយៈជំនួយអភិវឌ្ឍន៍ផ្លូវការផ្សេងៗ រួមទាំងជំនួយឥតសំណងបន្តទៀតផងដែរ។

 

សូមជម្រាបថា ចាប់ពីឆ្នាំ១៩៩១មក រដ្ឋាភិបាលជប៉ុនបានផ្តល់ជំនួយជាច្រើនដល់កម្ពុជា តាមរយៈគម្រោងជាង៧០០ នៅទូទាំងប្រទេសកម្ពុជា៕