ស្នាដៃសិល្ប:បុណ្យភូមិ១០ឆ្នាំ ចាប់ផ្ដើមតាំងបង្ហាញពីថ្ងៃ១មេសា ដល់ថ្ងៃ៥ឧសភា

ជាតិ

ស្នាដៃសិល្ប:បុណ្យភូមិ១០ឆ្នាំ ចាប់ផ្ដើមតាំងបង្ហាញពីថ្ងៃ១មេសា ដល់ថ្ងៃ៥ឧសភា

02, Apr 2023 , 12:59 pm

រូបភាព

រូបផ្ដល់ឱ្យ

ដោយ: ប៉ូ សាគុន

ភ្នំពេញ៖ ស្នាដៃគំនូរសិល្ប:បែបឌីជីថល និងស្នាដៃសិល្ប:ជាច្រើនទៀត របស់មហោស្រពបុណ្យភូមិ រយ:ពេល១០ឆ្នាំមកនេះ ត្រូវបានដាក់បង្ហាញ និងបើកឱ្យសាធារណជនបានចូលទស្សនា ដោយឥតគិតថ្លៃ ចាប់ពីថ្ងៃទី១ខែមេសា រហូតដល់ថ្ងៃទី៥ ខែឧសភា នៅវិចិត្រសាលសិល្បៈ ជាន់ទី៣៥ នៃសណ្ឋាគារ រ៉ូសវូដ ភ្នំពេញ។

ការដាក់បង្ហាញស្នាដៃសិល្ប: ដែលតែងតែមានការគាំទ្រជារៀងរាល់ឆ្នាំមកហើយនោះ ត្រូវបានធ្វើឡើង ដោយមានការចូលរួម ពីសិល្បករនៃឆ្នាំនីមួយៗ ដែលសុទ្ធសឹងជាយុវជន។

កញ្ញា រិទ្ធី លំអរពេជ្រ សហស្ថាបនិកា នៃមហោស្រពបុណ្យភូមិបានលើកឡើងថា បុណ្យភូមិមិនត្រឹមតែជួយផ្សព្ធផ្សាយពីសិល្ប:ខ្មែរទៅកាន់មហាជននោះទេ ប៉ុន្តែបុណ្យភូមិបានក្លាយជាសហគមន៍មួយ ដែលប្រមូលផ្តុំដោយយុវជន និងមនុស្សមានភាពច្នៃប្រឌិត។ បុណ្យភូមិ ក៏បានផ្តល់ឱកាសសម្រាប់ពួកគេបង្ហាញស្នាដៃ និងបញ្ចេញនូវសមត្ថភាពសិល្ប:ច្នៃប្រឌិតរបស់ខ្លួនដែរ។

«ជាការកត់សម្គាល់ទម្រង់សិល្ប:ជាច្រើន ដែលពិធីបុណ្យភូមិបានលើកយកទៅបង្ហាញ នៅក្នុងមហោស្រព សុទ្ធតែទទួលបានការចាប់អារម្មណ៍។ វាជាការរំលឹកឡើងវិញ នូវទម្រង់សិល្ប: ដើម្បីឱ្យប្រជាជនខ្មែរបានទទួលស្គាល់។ តួយ៉ាងដូចជាទម្រង់ល្ខោនខោល ដែលមាននូវក្នុងបទចម្រៀងបុណ្យភូមិកន្លងមក»។ នេះជាការបញ្ជាក់បន្ថែមរបស់ លំអរពេជ្រ។

ក្រៅពីការបង្ហាញស្នាដៃសិល្ប: បុណ្យភូមិឆ្នាំទី១០នេះ ក៏ចាប់ផ្តើមរៀបចំដែរ គឺចាប់ពីថ្ងៃទី០១ ខែមេសានេះ។ ក្នុងនោះក៏មានការចូលរួមប្រគុំតន្រ្តីសប្បុរធម៌ បុណ្យភូមិមានជើង ដោយមានការចូលរួមសម្តែងស្ម័គ្រចិត្តពីសិល្បករ និងសិល្បការិនីល្បីៗជាច្រើនរូប។

សូមរំលឹកថា បុណ្យភូមិក្នុងឆ្នាំ២០២៣នេះ នឹងធ្វើរយៈពេល១០ថ្ងៃ ដោយបែងចែកជា៣សប្ដាហ៍ និងចែកចេញជា៣ទីតាំង។ សប្ដាហ៍ទី១ មានឈ្មោះថា “សប្ដាហ៍សិល្បៈសម័យ” ធ្វើនៅហ្វេកតូរីភ្នំពេញ នៅថ្ងៃទី១-២ ខែមេសា។ សម្រាប់សប្ដាហ៍ទី១នេះ មានការលក់សំបុត្រ។

សប្ដាហ៍ទី២ មានឈ្មោះថា “សប្ដាហ៍ពិសេស” ធ្វើនៅផ្សារជីបម៉ុងមេហ្គាម៉ល ២៧១ នៅថ្ងៃទី៣-៤-៥-៦ ខែមេសា ចូលរួមដោយឥតគិតថ្លៃ។ និងសប្ដាហ៍ទី៣ មានឈ្មោះថា “សប្ដាហ៍បុរាណ” ធ្វើនៅទីតាំងវត្តដែលមានចម្ងាយ ៤៥នាទីពីរាជធានី ធ្វើនៅថ្ងៃទី៧-៨-៩ ខែមេសា ចូលរួមដោយឥតគិតថ្លៃ។ បន្ថែមជាមួយគ្នានោះ ក៏មានសប្ដាហ៍គំនូរ ដែលនឹងធ្វើឡើងនៅសណ្ឋាគាររ៉ូសវូដភ្នំពេញ នៅវិចិត្រសាលនៃសណ្ឋាគារ រ៉ូសវូដភ្នំពេញ ដែលនឹងចាប់ផ្ដើមដាក់តាំងបង្ហាញ ពីថ្ងៃទី១មេសា ដល់ថ្ងៃទី២១ ខែឧសភា ឆ្នាំ២០២៣៕