យុវជន៖«ស្ត្រីត្រូវតែលើកតម្លៃខ្លួនឯង មុនរំពឹងឲ្យគេលើកតម្លៃ»

ជាតិ

យុវជន៖«ស្ត្រីត្រូវតែលើកតម្លៃខ្លួនឯង មុនរំពឹងឲ្យគេលើកតម្លៃ»

03, Apr 2023 , 10:35 am

រូបភាព

ដោយ: ប៉ូ សាគុន

ភ្នំពេញ៖ យុវជនមួយក្រុមអាយុចន្លោះពី១៨-២៦ឆ្នាំ បានរួមគ្នាធ្វើយុទ្ធនាការរត់ម៉ារ៉ាតុន នៅក្រុងសៀមរាប ដើម្បីលើកកម្ពស់សិទ្ធិស្ត្រី ពិសេសដើម្បីអបអរទិវានារីអន្តរជាតិ។ យុវជនដែលបានចូលរួម ក្នុងព្រឹត្តិការណ៍នេះ បានលើកឡើងថា ស្ត្រីត្រូវតែក្លាហាន និងលើកតម្លៃខ្លួនឯង មុនពេលរំពឹកអ្នកដទៃលើកតម្លៃឱ្យ។

ព្រឹត្តិការណ៍រត់ម៉ារ៉ាតុន ដែលរៀបចំដោយយុវជនមួយក្រុម មានឈ្មោះថា “យុវជនពណ៌ស្វាយ” បានចាប់ផ្ដើមរត់ពីចំណុចសួនច្បារ ទល់មុខព្រះអង្គចេកព្រះអង្គចម កាត់តាមផ្លូវហ្សាលដឺហ្គូល ឆ្លងកាត់មុខប្រាសាទអង្គរវត្ត ឆ្ពោះទៅខ្លោងទ្វារទន្លេរអុំ ដែលជាគោលដៅចុងបញ្ចប់។ យុវជនយុវនារី និងកុមារាកុមារី ប្រមាណ១០០នាក់បានចូលរួម យុទ្ធនាការណ៍រត់ម៉ារ៉ាតុននេះ ដោយសេចក្ដីស្វាហាប់។ ពួកគេទាំងអស់រត់ផងដើរផង ដើម្បីទៅដល់គោលដៅ។ ក៏មានដែរអ្នកបោះបង់ការប្រកួត ដោយសារតែសុខភាពមិនអំណោយផល។

ស្ថិតនៅជិតខ្លោងទ្វារទន្លេអុំផ្នែកខាងក្នុង កញ្ញា ម៉ាត់ ស្រីជាក់ គឺជាបេក្ខនារីដែលរត់ដល់ទី ដំបូងគេបង្អស់ផ្នែកនារី។ មានវ័យ២៤ឆ្នាំ ស្រីជាក់ ដែលមកពីខេត្តបន្ទាយមានជ័យ មិនធ្លាប់រត់ម៉ារ៉ាតុនពីមុនមកឡើយ។ ប៉ុន្តែនាងជាអ្នកចូលចិត្តហាត់ប្រាណ ពិសេសការដើររយៈចម្ងាយឆ្ងាញ គឺប្រមាណចន្លោះពី៥ទៅ១០គីឡូម៉ែត្រក្នុង១ដង។

កញ្ញា ម៉ាត់ ស្រីជាក់ ជយលាភីលេខ១ ផ្នែកនារី

នារីសម្បុរសញញឹមស្រស់រូបនេះ អះអាងថា នាងមានជំនឿយ៉ាងមុតមាំ ថានាងប្រាកដជាអាចរត់ដល់ទី ទោះជាប់លេខឬមិនជាប់ក៏ដោយ ហើយនោះគឺជាភាពជោគជ័យ ដែលនាងបានកំណត់។ នារីសម្ដីញាប់លះ ពោរពេញដោយទំនុកចិត្តរូបនេះ បានប្រៀបធៀបល្បឿននៃការរត់របស់ខ្លួន ទៅនឹងទំហំនៃការប្ដេជ្ញាចិត្ត លើកកម្ពស់តម្លៃស្ដ្រី ពិសេសតម្លៃខ្លួនឯង។

ស្រីជាក់ បន្ថែម៖«ខ្ញុំមានក្ដីសង្ឃឹមតាំងពីពេលខ្ញុំដាក់ពាក្យម្ល៉េះ។ មានក្ដីសង្ឃឹមថាខ្លួនឯងអាចធ្វើបាន។ ចំពោះការឈ្នះលេខ១ ខ្ញុំសង្ឃឹម៥០ភាគរយដែរ។ ខ្ញុំមិនដែលរត់ម៉ារ៉ាតុនទេ តែខ្ញុំចូលចិត្តហាត់ប្រាណជារឿយៗ និងដើរពីវត្តសន្សំកុសល ដល់វត្តបទុមជិតមាត់ទន្លេ»។

ឈរលើវាលស្មៅ ដែលមានសណ្ឋានដីខ្ពស់ទាបតាមធម្មជាតិ ក្នុងបរិវេណខ្លោងទ្វារទន្លេអុំ ក្រោយពេលបញ្ចប់ការរត់ប្រណាំង នាម៉ោងប្រមាណ១០ព្រឹក នារីសក់វែងគ្របខ្នងរូបនេះ ពិតជាសប្បាយចិត្ត ដែលនាងបានចូលរួមរត់ម៉ារ៉ាតុន ដើម្បីលើកកម្ពស់សិទ្ធិស្ត្រី។ នាងអះអាងថា ការចូលរួមរត់ម៉ារ៉ាតុន ដើម្បីសិទ្ធិស្ត្រីនេះ គឺជាឱកាសបង្ហាញការប្ដេជ្ញាចិត្តរបស់នាង ទៅកាន់ពិភពលោក ថានាងពិតជាមានសមត្ថភាពលើកកម្ពស់សិទ្ធិខ្លួនឯង និងស្ត្រីទាំងអស់។

«ខ្ញុំជាស្ត្រី ខ្ញុំក៏ចង់ទាមទារសិទ្ធិឯករាជឱ្យខ្លួនឯងដែរ។ ខ្ញុំក៏ចង់ទទួលបានសិទ្ធិផ្សេងៗទៀត ដែលបុរសមើលមិនឃើញ ឬមើលរំលងគុណតម្លៃរបស់ស្ត្រីដែរ។ នេះជាឱកាសមួយ ដែលខ្ញុំអាចផ្សារភ្ជាប់ខ្លួនឯង ដើម្បីបើកបង្ហាញទៅកាន់ពិភពលោកថា ស្ត្រីក៏អាចធ្វើបាន។ មួយវិញទៀតខ្ញុំគិតថា គេធ្វើយុទ្ធនាការ ដើម្បីលើកកម្ពស់សិទ្ធិស្ត្រី ហើយក្នុងនាមខ្ញុំជាស្ត្រី បើមិនចូលរួមលើកកម្ពស់សិទ្ធិខ្លួនឯង តើឱ្យអ្នកណាគេលើកទៅ»។ នេះជាការប្ដេជ្ញាចិត្តរបស់កញ្ញា ម៉ាត់ ស្រីជាក់ ។

ចំណែកលោក ស៊ុយ កុសល្យ វ័យ១៥ឆ្នាំ ក៏មានគោលបំណងមុតមាំ ទៅលើការរត់ម៉ារ៉ាតុននេះដែរ។ ជាសិស្សវិទ្យាល័យថ្នាក់ទី១០ រៀនក្នុងខេត្តសៀមរាម កុសល្យ មកចូលរួមរត់ម៉ារ៉ាតុន ដើម្បីបង្ហាញថា លោកគាំទ្រយ៉ាងពេញទំហឹង ចំពោះការលើកតម្កើងសិទ្ធិស្ត្រី។

ក្មេងប្រុសសម្បុរសមាឌមាំខ្ពស់ស្រឡះរូបនេះ បានដឹងពីយុទ្ធនាការរត់ខាងលើ តាមរយៈប្រព័ន្ធផ្សព្វផ្សាយសង្គមហ្វេសប៊ុក។ អ្នកខេត្តសៀមរាបរូបនេះ តែងមានទម្លាប់រត់៤ទៅ៥គីឡូម៉ែត្រជារៀងរាល់ព្រឹក មុនពេលដែលគេទៅសាលារៀន។

លោក ស៊ុយ កុសល្យ ជយលាភីលេខ១ ផ្នែកបុរស

បានទទួលចំណាត់ថ្នាក់លេខ១ ក្នុងការរត់ម៉ារ៉ាតុនលើកនេះ កុសល្យ ថាខ្លួនមានគោលដៅច្បាស់លាស់។ មកដល់ទីលានរត់ក្រោយគេ ខណៈពេលដែលអ្នករត់ផ្សេងៗទៀត បានចេញដំណើរទៅអស់ទៅហើយ ប៉ុន្តែ កុសល្យ នៅតែអាចរត់ទៅដល់ទីមុនគេ និងទទួលបានលេខ១។

ឈរក្បែរដើមឈើធំមួយ ដោយដៃស្ដាំកាន់ស្លាកលេខ និងដៃឆ្វេងកាន់មេដាយ កុសល្យ បន្ថែមដូច្នេះ៖«ខ្ញុំសង្ឃឹមបានលេខ១ ព្រោះខ្ញុំមានគោលដៅច្បាស់លាស់ មានភាពអំណត់ និងការព្យាយាម។ ខ្ញុំចូលចិត្តចូលរួមកម្មវិធីបែបនេះ និងចង់លើកតម្កើងសិទ្ធិស្ត្រី។ ការលើកតម្កើងសិទ្ធិស្ត្រី គឺការចូលរួមផ្សព្វផ្សាយ គោរព និងឱ្យតម្លៃស្ត្រី»។

ចំណែកឯបេក្ខនារី ឡូវ សាំលី អាយុ១៨ឆ្នាំ ដែលមានស្រុកកំណើតនៅខេត្តសៀមរាបដែរនោះ បានទទួលចំណាត់ថ្នាក់លេខ២។ នារីដែលរៀនថ្នាក់ទី១១រូបនេះ ចូលរួមរត់ម៉ារ៉ាតុន ដោយនាងយល់ឃើញថា ស្ត្រីដើរតួនាទីយ៉ាងសំខាន់ក្នុងសង្គម ក៏ដូចជាការអភិវឌ្ឍន៍ជាតិ។ ស្ត្រីជាមាតាដៃមួយរយ ដែលបុរសគួរតែយល់ដឹង ហើយស្ត្រីអាចធ្វើរឿងគ្រប់យ៉ាងបាន ដូចបុរសដែរ។

កញ្ញា ឡូវ សាំលី ជយលាភីលេខ២ ផ្នែកនារី

នារីមាឌមាំ ដែលមករត់មិនមែនដើម្បីមេដាយ ប៉ុន្តែដើម្បីសិទ្ធិស្ត្រីរូបនេះ បានមើលឃើញថា បច្ចុប្បន្នស្ត្រីមានសិទ្ធិក្នុងការបញ្ចេញមតិ និងចូលរួមសកម្មភាពផ្សេងៗក្នុងសង្គម បានច្រើនជាងមុន។ ទោះជាយ៉ាងណាក៏ដោយ នាងនៅតែលើកទឹកចិត្តស្ត្រី ឱ្យមានភាពក្លាហានថែមទៀត ដើម្បីជំនះគ្រប់ឧបសគ្គ។

សាំលី ពន្យល់៖«ខ្ញុំរត់មិនទាន់បានពាក់កណ្ដាលផង ខ្ញុំចង់ឈប់រត់ព្រោះហត់ពេក។ ប៉ុន្តែខ្ញុំគិតថា បើដើរផងរត់ផង ប្រសើរជាងបោះបង់ ខ្ញុំក៏បន្តទៅមុខទៀត រហូតដល់គោលដៅ។ នៅពេលរត់ជិតដល់គោលដៅ ខ្ញុំសប្បាយចិត្ត ទោះបានលេខឬមិនបានក៏ដោយ»។

ឈរក្បែរបេក្ខជនជាប់លេខ១ លោក ទុត សុផាន គឺជាបេក្ខជនជាប់លេខ២។ អាយុ២៥ឆ្នាំ សុផាន មករត់ម៉ារ៉ាតុន ដើម្បីលំហែកាយផង និងដើម្បីបានឈ្វេងយល់បន្ថែមអំពីយុទ្ធនាការនេះផង។ ជាបុគ្គលិកផ្នែកព័ត៌មានវិទ្យា បុរសសម្បុរស្រអែមរូបនេះ បានមើលឃើញថា សង្គមបច្ចុប្បន្នមិនទាន់បានឱ្យតម្លៃសិទ្ធិស្ត្រីពេញលេញនៅឡើយទេ ទាំងការងារ និងជំនាញ។ ទោះជាយ៉ាងណាក៏ដោយ លោកយល់ឃើញថា ទង្វើរបស់ស្ត្រីខ្លួនឯង ក៏ជាដើមហេតុ នាំឱ្យបុរសនិងសង្គម មិនឱ្យតម្លៃពួកគេដែរ។

សកម្មភាពមុនរត់ម៉ារ៉ាតុន(រូបផ្ដល់ឱ្យ

អ្នកខេត្តសៀមរាបរូបនេះ បានលើកពីករណីនៃការស្លៀកពាក់ មកពន្យល់ដូច្នេះ៖«នារីខ្លះស្លៀកខ្លីពេក រហូតពិបាកមើល។ កត្តានេះធ្វើឱ្យគេមិនឱ្យតម្លៃដែរ។ វាគឺជាសិទ្ធិរបស់គាត់ ប៉ុន្តែប្រពៃណីខ្មែរយើង និងសង្គមយើង គេពិបាកទទួលយក។ ត្រង់ចំណុចនេះ ខ្ញុំគិតថាពួកគាត់មិនឱ្យតម្លៃខ្លួនឯង។ ពួកគាត់មានសិទ្ធិ ប៉ុន្តែសិទ្ធិនោះក៏មានដែនកំណត់ដែរ។ បើជ្រុលហួសហេតុពេក គេត្រូវតែរិះគន់ហើយ»។

ចំណែកឯកញ្ញា ហ៊ន សុខលាង ដែលជាសមាជិកក្នុង “ក្រុមយុវជនពណ៌ស្វាយ” បានប្រាប់សារព័ត៌មានថ្មីៗ ក្រោយពេលបញ្ចប់ការរត់ជាស្ថាពរថា ក្នុងសង្គមកម្ពុជា ការឱ្យតម្លៃលើសិទ្ធិស្ត្រី មាននៅដោយដុំ។ កញ្ញាថា តំបន់ដែលមានការអភិវឌ្ឍ ស្ត្រីមានឱកាសរៀន និងចូលរួមក្នុងសកម្មភាពសង្គមច្រើន អាចច្រើនជាងបុរសផង។ ប៉ុន្តែនៅតំបន់ជនបទដាច់ស្រយាល មនុស្សនៅតែប្រកាន់គំនិតចាស់ គឺស្ត្រីបង្វិលចង្រាន្តមិនជុំ។

«នៅតំបន់ដាច់ស្រយាល ស្ត្រីត្រូវតស៊ូមតិច្រើន នៅពេលដែលពួកគេចង់ធ្វើអ្វីមួយ ទៅតាមក្ដីស្រមៃ ឬការស្រឡាញ់ចូលចិត្ត។ ពួកគេតែងទទួលបាន ការបន្ទច់បង្អាក់ ឬហាមឃាត់ដាច់ខាតតែម្ដង មិនឱ្យធ្វើរឿងទាំងនោះ។ ភាគច្រើនស្ត្រីជនជាតិដើមភាគតិច គាត់ជួបបញ្ហាទាំងនោះ»។ នេះជាការពន្យល់បន្ថែមរបស់កញ្ញា ហ៊ន សុខលាង។

កញ្ញា ហ៊ន សុខលាង សមាជិក ក្រុមយុវជនពណ៌ស្វាយ (ឆ្វេង) (រូបផ្ដល់ឱ្យ)

សូមបញ្ជាក់ថា មនុស្សប្រមាណជាង១០០នាក់ បានចូលរួមរត់ម៉ារ៉ាតុន ជាមួយក្រុម “យុវជនពណ៌ស្វាយ” ដើម្បីលើកកម្ពស់សិទ្ធិស្ត្រី នៅខេត្តសៀមរាបកាលពីពេលកន្លងទៅ។ “ក្រុមយុវជនពណ៌ស្វាយ” រំពឹងថាការរត់ខាងលើ នឹងអាចបញ្ជ្រាបសារស្ដីពីសិទ្ធិស្ត្រី ទៅកាន់យុវជនដែលចូលរួមរត់ប្រមាណ ៥០ទៅ៦០ភាគរយ។ រីឯសាធារណជនវិញ អាចជ្រាបបានប្រមាណ២០ទៅ៤០ភាគរយដែរ តាមរយៈពាក្យស្លោក ដែលបានបិទនៅនឹងអាវរបស់អ្នករត់នីមួយៗ។ សុខលាង ដែលមានមាឌមាំខ្ពស់សម្បុរស ប្ដេជ្ញាចិត្តថា ក្រុមរបស់ខ្លួននឹងធ្វើយុទ្ធនាការរត់ម៉ារ៉ាតុន ដើម្បីលើកកម្ពស់សិទ្ធិស្ត្រីជារៀងរាល់ឆ្នាំ។ ហើយឆ្នាំក្រោយ អាចនឹងធ្វើធំជាងឆ្នាំនេះ។

សូមរំលឹកថា “យុវជនពណ៌ស្វាយ” បង្កើតឡើងក្នុងឆ្នាំ២០២២។ ឆ្នាំដំបូង “យុវជនពណ៌ស្វាយ” បានធ្វើវេទិកាអនឡាញមួយ ពិភាក្សាគ្នាលើប្រធានបទសិទ្ធិស្ត្រី មានអ្នកចូលរួមរង្វង់៩០នាក់។ យុទ្ធនាការនេះ បានបង្ហោះសារពាក់ព័ន្ធនឹងសិទ្ធិស្ត្រី ដើម្បីអបអរសាទរទិវានារីអន្តរជាតិ នៅលើហ្វេសប៊ុកផេក “យុវជនពណ៌ស្វាយ។

សកម្មភាពក្រោយរត់ម៉ារ៉ាតុន (រូបផ្ដល់ឱ្យ)

ដោយឡែកក្នុងឆ្នាំ២០២៣នេះ “យុវជនពណ៌ស្វាយ” បានធ្វើយុទ្ធនាការរត់ម៉ារ៉ាតុន ដើម្បីលើកកម្ពស់សិទ្ធិស្រ្តី និងដើម្បីអបអរសាទរទិវាសិទ្ធិនារីអន្តរជាតិ នៅទីសាធារណៈ ដោយមានសារចំនួន១០ពាក់ព័ន្ធនឹងសិទ្ធិស្ត្រី បិទជាប់នឹងអាវផងដែរ។

សមាជិក”ក្រុមយុវជនពណ៌ស្វាយ” ជាយុវជនមកពីមជ្ឈដ្ឋានផ្សេងៗ រួមគ្នាបង្កើតក្រុម ដើម្បីបង្កើតសកម្មភាពលើកកម្ពស់សិទ្ធិស្ត្រី ក៏ដូចជាយេនឌ័រ។ យុវជនពណ៌ស្វាយបែងចែកជា២ មានក្រុមស្នូល៣នាក់ និងអ្នករៀបចំធម្មតា១០នាក់ ដែលមានអាយុចន្លោះពី១៨-២៦ឆ្នាំ។ ភាគច្រើនពួកគេគឺជាសិស្សនិស្សិត នៅសកលវិទ្យាល័យ ជាសមាជិកនៃសមាគមបណ្ដាញយុវជនកម្ពុជា ជាបុគ្គលិកហាត់ការ និងជាអតីតបុគ្គលិក នៅក្នុងសមាគមបណ្ដាញយុវជនកម្ពុជា។ “ក្រុមយុវជនពណ៌ស្វាយ" ភាគច្រើនជានារី៕