ការប្រកាសរបស់ CAMSOC ធ្វើឡើងបន្ទាប់ពីមានព័ត៌មានពីសំណាក់គណៈកម្មាធិការអូឡាំពិកហ្វីលីពីន (POC) ចំពោះលទ្ធផលនៃការចាប់ឆ្នោតវិញ្ញសាបាល់ទះក្នុងសាលផ្នែកបុរសកាលពីថ្ងៃទី៥ មេសា ដោយគ្មានវត្តមានពួកគេ។ 

កាលពីថ្ងៃទី៥ ខែមេសា POC បានបង្ហាញប្រតិកម្មចំពោះការចាប់ឆ្នោតលើវិញ្ញសាបាល់ទះបុរសនេះ ដោយគ្មានវត្តមានរបស់ក្រុមហ្វីលីពីនក្នុងកម្មវិធីចាប់ឆ្នោតចែកពូលនោះ​ ទាំងដែលក្រុមខ្លួនបានបញ្ចូលវិញ្ញាសាបាល់ទះបុរសនេះមកប្រកួតនៅស៊ីហ្គេមលើកទី៣២។

 

ក្រោយរយៈពេលមួយថ្ងៃបន្ទាប់ពីការចាប់ឆ្នោតរួចមក គណៈកម្មាធិការ CAMSOC បានរៀបចំកិច្ចពិភាក្សាក្នុងចំណោមថ្នាក់ដឹកនាំ​របស់ CAMSOC ក៏ដូចជាថ្នាក់ដឹកនាំរបស់សហព័ន្ធបាល់ទះកម្ពុជា សម្រេចគាំទ្រឱ្យបញ្ចូលក្រុមហ្វីលីពីនទៅក្នុងការប្រកួត នឹងបានស្នើឱ្យមានការចាប់ឆ្នោតចែកពូលឡើងវិញសម្រាប់វិញ្ញសាបាល់ទះក្នុងសាលផ្នែកបុរសនេះ។
 

«ដោយយោងទៅលើព័ត៌មានដែលទាក់ទងដោយគណៈកម្មាធិការអូឡាំពិកហ្វីលីពីន (POC) ទៅនឹងលទ្ធផលនៃការចាប់ឆ្នោតក្រុមបាល់ទះក្នុងសាល គណៈកម្មាធិការ CAMSOC ដែលទទួលបន្ទុករៀបចំកីឡាស៊ីហ្គេមលើកទី ៣២ គាំទ្រយ៉ាងពេញទំហឹង ចំពោះការចូលរួមប្រកួតបាល់ទះក្នុងសាលពីសំណាក់ហ្វីលីពីន នៅស៊ីហ្គេមលើកទី ៣២។»។ នេះបើតាមសេចក្តីថ្លែងការណ៍របស់ CAMSOC។
 

ទោះយ៉ាងណាគណៈកម្មាធិការ CAMSOC ក៏បានជំរុញឱ្យមានការចាប់ឆ្នោតឡើងវិញលើវិញ្ញសាបាល់ទះក្នុងសាលដោយមានរួមបញ្ចូលហ្វីលីពីន ប៉ុន្តែការចាប់ឆ្នោតឡើងវិញនេះ ក៏ត្រូវទទួលបានការគាំទ្រយ៉ាងហោចណាស់ចំនួន ៥ ពីសំណាក់ប្រទេសដទៃទៀត រួមទាំងហ្វីលីពីនខ្លួនឯងផ្ទាល់៕