ជាតិ
បឋមសិក្សាឯកជន ត្រូវសិក្សាភាសាខ្មែរពីជាង៣០០ទៅជិត៥០០ម៉ោងក្នុង១ឆ្នាំសិក្សា
លោក ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា។ រូបថត MoEYS Cambodia
×![]()
ក្រសួងអប់រំ យុវជន និងកីឡា កាលពីថ្ងៃទី២៩ ខែមីនា បានចេញសេចក្តីណែនាំស្តីពីការពង្រឹងការអនុវត្តកម្មវិធីសិក្សាមុខវិជ្ជាភាសាខ្មែរ និងការបញ្ជ្រាបវប្បធម៌ អរិយធម៌ក្នុងម៉ោងសិក្សានៅតាមគ្រឹះស្ថានសិក្សាឯកជន។ តាមរបាយម៉ោងសិក្សា មុខវិជ្ជាភាសាខ្មែរត្រូវមានពីជាង៣០០ម៉ោងទៅជិត៥០០ម៉ោងតាមកម្រិតថ្នាក់នីមួយៗ។
កម្មវិធីភាសាខ្មែរពី៨ម៉ោងទៅ១៣ម៉ោងក្នុង១សប្តាហ៍តាមកម្រិតសិក្សា
កម្មវិធីសិក្សាភាសាខ្មែរពីថ្ងៃចន្ទដល់ថ្ងៃសុក្រនៅសាលាបឋមសិក្សាឯកជន ត្រូវតម្រូវឱ្យមានចំនួន១៣ម៉ោងក្នុង១សប្តាហ៍ (៤៩៤ម៉ោងក្នុង១ឆ្នាំ) សម្រាប់ពីថ្នាក់ទី១ ដល់ទី៣, ១០ម៉ោងក្នុង១សប្តាហ៍ (៣៨០ម៉ោងក្នុង១ឆ្នាំ) សម្រាប់ថ្នាក់ទី៤ និង៨ម៉ោង ក្នុងសប្តាហ៍ (៣០៤ម៉ោងក្នុង១ឆ្នាំ) សម្រាប់ថ្នាក់ទី៥ និងទី៦។ បើតាមក្រសួង កាលវិភាគអាចបន់បែន តែត្រូវរក្សាចំនួនម៉ោងប្រចាំសប្តាហ៍ទៅតាមនិយាម។
ក្នុងសេចក្តីណែនាំដល់ទៅ៥ទំព័រ លោករដ្ឋមន្ត្រី ហង់ជួន ណារ៉ុន បានលើកឡើងថា ភាសាខ្មែរ ជាភាសាជាតិ និងជាភាសាផ្លូវការ ដូច្នេះការប្រើប្រាស់ភាសាខ្មែរត្រឹមត្រូវ ជាការរួមចំណែកដ៏ធំក្នុងកិច្ចការថែរក្សាអត្តសញ្ញាណជាតិ និងលើកកម្ពស់តម្លៃវប្បធម៌ អរិយធម៌ និងប្រជាជាតិខ្មែរ។
«មុខវិជ្ជាភាសាខ្មែរ ជាមុខវិជ្ជាកាតព្វកិច្ចសម្រាប់សិក្សានុសិស្សដែលមានសញ្ជាតិខ្មែរ រីឯការអប់រំវប្បធម៌ អរិយធម៌ខ្មែរ ក៏ត្រូវបានបញ្ជ្រាបក្នុងម៉ោងសិក្សាមុខវិជ្ជាភាសាខ្មែរ សិក្សាសង្គម និងមុខវិជ្ជាដទៃទៀតផងដែរ»។ លោក ហង់ជួន ណារ៉ុន បានបញ្ជាក់យ៉ាងដូច្នេះ។
ជាមួយគ្នានេះ ក្រសួងបានលើកឡើងយ៉ាងច្បាស់ថា គោលបំណងនៃការសិក្សាភាសាខ្មែរនៅកម្រិតបឋម គឺចង់បណ្តុះ និងអភិវឌ្ឍនូវបំណិនមូលដ្ឋាន ដូចជាការនិយាយ ប្រើប្រាស់ពាក្យ រាជសព្ទ សង្ឃសព្ទ ការអាន ការសរសេរ ត្រឹមត្រូវតាមក្បួនខ្នាត រួមទាំងបណ្តុះទម្លាប់ឱ្យសិស្សចូលចិត្តប្រើប្រាស់ភាសាខ្មែរក្នុងការធ្វើទំនាក់ទំនងក្នុងគ្រួសារ និងសង្គម។
ប្រើប្រាស់កម្រិតសំណួរទាំង៦របស់ប្លូម
ទាក់ទងនឹងការអនុវត្តវិធីសាស្ត្របង្រៀន ក្រសួងឱ្យបណ្តុះស្មារតីសិស្សយល់ពីរបៀបរៀនដោយខ្លួនឯង ដោយមិនត្រឹមតែជាការធ្វើត្រាប់តាម ការអនុវត្តគោលវិធីសិស្សមជ្ឈមណ្ឌល ការប្រើប្រាស់វិធីសាស្ត្របង្រៀនស្របតាមកាលៈទេសៈ និងស្ថានភាព ជំនាញរកចំណុចគន្លឹះ ការបង្កើតល្បែងសិក្សា ស្ថិតក្នុងចំណោមវិធីសាស្ត្រដែលត្រូវអនុវត្ត ជាពិសេសការប្រើប្រាស់កម្រិតសំណួរទាំង៦របស់ប្លូម គឺ ចងចាំ យល់ដឹង អនុវត្ត វិភាគ វាយតម្លៃ និងបង្កើតថ្មី។
ម៉ោងសិក្សាត្រូវបែងចែកទៅតាមសមត្ថភាព និងបំណិននានា ក្នុងនោះ សមត្ថភាពស្តាប់ប្រហែល១០ភាគរយ សមត្ថភាពនិយាយប្រហែល១០ភាគរយ សមត្ថភាពអានប្រហែល៣០ភាគរយ សមត្ថភាពសរសេរប្រហែល៣០ភាគរយ សិក្សាវេយ្យាករណ៍ប្រហែល១០ភាគរយ និងសិក្សាសម្រាប់បំណិនប្រហែល១០ភាគរយ។
ការអប់រំវប្បធម៌ និងអរិយធម៌ខ្មែរ
ចំពោះការអប់រំវប្បធម៌ និងអរិយធម៌ខ្មែរវិញ ក្រសួងឱ្យគ្រូបង្រៀនទាំងអស់សិក្សាស្វែងយល់ និងមានចំណេះដឹងទូលំទូលាយ ហើយបញ្ជ្រាបការអប់រំ ទៅតាមខ្លឹមសារមេរៀននៃសៀវភៅសិក្សាគោលភាសាខ្មែរ ជាពិសេសការបង្ហាញអំពីអត្តសញ្ញាណជាតិខ្មែរឱ្យបានផុសផុលជាងវប្បធម៌បរទេស។
ការចូលរួមរបស់មាតា អាណាព្យាបាល ក៏ជាកត្តាសំខាន់ផងដែរ ដោយក្រសួងស្នើឱ្យពួកគេប្រើប្រាស់ពេលវេលាតាមដែលអាចធ្វើទៅបានក្នុងការជំរុញកូនៗឱ្យខិតខំរៀនសូត្រ និងយល់ដឹងស៊ីជម្រៅអំពីវប្បធម៌ និងអរិយធម៌ខ្មែរ។ «ឆ្លៀតពេលអានរឿងនិទានឱ្យកូនតូចៗស្តាប់ ពន្យល់អំពីបុគ្គលិកលក្ខណៈតួអង្គក្នុងរឿងឱ្យកូនយល់ និងអាចបកស្រាយខ្លឹមសាររឿងដោយខ្លួនឯង»។ នេះជាការក្រើនរំឭកមួយរបស់ក្រសួងអប់រំ។
ចំណុចផ្សេងទៀតដែលក្រសួងអប់រំ បានណែនាំដល់ឪពុកម្តាយ អាណាព្យាបាល មានដូចជា ការទម្លាប់និយាយភាសាខ្មែរជាមួយកូនៗ ការរំឭកអំពីថ្ងៃបុណ្យប្រពៃណីជាតិនានា និងការនាំពួកគេចូលរួមព្រឹត្តិការណ៍វប្បធម៌ ប្រពៃណី ការលេងល្បែងកម្សាន្ត និងការចូលរួមពិធីសាសនាផ្សេងៗទៀត។
ការអនុវត្តរបស់សាលាឯកជន នឹងស្ថិតក្រោមការពិនិត្យតាមដានរបស់មន្ត្រីអធិការកិច្ចនៃក្រសួងអប់រំ ជាពិសេសលើការអនុវត្តកម្មវិធីសិក្សា ការដឹកនាំគ្រប់គ្រង ការបង្រៀននិងការរៀន រួមទាំងការងាររដ្ឋបាល៕
Tag:
អប់រំ
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
4 ថ្ងៃ
