Women World Cup នៅប្រទេសអូស្ត្រាលី និងនូវែលសេឡង់ គឺជាប្រកួតបាល់ទាត់ស្ត្រីលើកដំបូងប្រចាំប្រវត្តិសាស្ត្រ FIFA ដែលមានការបង្កើនក្រុមចូលរួមរហូតដល់ ៣២ក្រុម។ ការប្រកួតនឹងចាប់ផ្តើមឡើងនៅថ្ងៃទី២០ ខែកក្កដា ឆ្នាំ២០២៣តទៅ។
  

«ត្រឹមតែ ១០០ថ្ងៃទៀតប៉ុណ្ណោះ ពេលវេលាកំពុងខិតជិតដល់ហើយ យើងនឹងឃើញការប្រកួតបាល់ទាត់ដ៏អស្ចារ្យបំផុតរបស់ពិភពលោកនៅក្នុងប្រទេសដែលពោរពេញទៅដោយឆ្នេរសមុទ្រ នៅអូស្ត្រាលី និងនូវែលសេឡង់។ ការប្រកួតបើកឆាក ២ប្រកួតដំបូងបង្អស់ ដែលធ្វើនៅកីឡដ្ឋាន Eden Park ក្នុងទីក្រុង Auckland និងនៅទីក្រុងស៊ីដនីថ្ងៃបន្ទាប់ ដែលចាប់ផ្តើមពីថ្ងៃទី២០ ខែកក្កដា ឆ្នាំ ២០២៣ ទៅនឹងក្លាយជាការប្រកួតដ៏ធំប្រចាំប្រវត្តិសាស្ត្របាល់ទាត់ស្ត្រី។»។ នេះបើតាមនាយកប្រតិបត្តិព្រឹត្តិការណ៍ Women World Cup លោក David Beeche និយាយក្នុងពិធីរាប់ថយក្រោយនៅកីឡដ្ឋានបាល់ទាត់ Sydney។
 

លើសពីនេះ លោក Beeche ក៏បានបន្ថែមថា​ការប្រកួត Women World Cup មិនមែនត្រឹមតែជាការប្រកួតតែប៉ុណ្ណោះទេ ប៉ុន្តែក៏ដើម្បីជាការផ្សព្វផ្សាយនៃថាមពលសមភាពយេនឌ័រក្នុងកីឡា និងថាមពលរបស់ស្ត្រីទៅកាន់ពិភពលោក។
 

ដោយឡែកសម្រាប់ការរៀបចំព្រឹត្តិការណ៍ពានរង្វាន់បាល់ទាត់ស្រ្តីលំដាប់ពិភពលោកនេះ អ្នករៀបចំកម្មវិធីបានរំពឹងថានឹងទទួលបានអ្នកទស្សនាការប្រកួតចំនួន ២លាននាក់ពេញមួយព្រឹត្តិការណ៍៕