ជាតិ
សង្រ្កាន្តឆ្នាំថ្មី
×![]()
ដោយ: ប៉ូ សាគុន
ភ្នំពេញ៖ ប្រជាជនខ្មែរ មិនដែលចោលឡើយ ដើមចេកសន្លឹក៣ ឬហៅថា(ដើមចេកស្លឹកត្រចៀកទន្សាយ) ដើម្បីធ្វើជាគ្រឿងរណ្ដាប់ ថ្វាយទេវតាឆ្នាំថ្មី។ ការថ្វាយដើមចេកនេះ ជាតំណាងឱ្យដើមពោធិ ដែលព្រះពុទ្ធបានត្រាស់ដឹង។ ទោះជាយ៉ាងណា ការតំណាងនេះ លោកឧទ្ទេសាចារ្យ អះអាងថា រកមិនឃើញក្នុងគម្ពីរណាមួយឡើយ ប៉ុន្តែជានិម្មិតរូបនៃជំនឿ។
លោកឧទ្ទេសាចារ្យ វ៉ាយ វិបុល បានប្រាប់សារព័ត៌មានថ្មីៗថា ពុំមានឯកសារស្រាវជ្រាវ ឬគម្ពីរណាមួយ បញ្ជាក់អំពីដើមហេតុឬមូលហេតុ នៃការយកដើមចេកស្លឹកត្រចៀកទន្សាយ ទៅរៀបជាគ្រឿងសក្ការៈ សម្រាប់ថ្វាយទេវតាឆ្នាំថ្មីឡើយ។ ប៉ុន្តែនេះគឺជាទំនៀម ដែលប្រជាជនខ្មែរ ធ្វើតាំងពីបុរាណ ហើយតរហូតដល់បច្ចុប្បន្ន។ បើទោះបីជារកមិនឃើញឯកសារបញ្ជាក់ក្ដី ប៉ុន្តែលោកឧទ្ទេសាចារ្យអះអាងថា ដូនតាខ្មែរមុននឹងធ្វើអ្វីមួយ តែងតែមានហេតុផលច្បាស់លាស់។
ដើម្បីដឹងពីការបកស្រាយលម្អិត សូមលោក លោកស្រី អញ្ជើញស្ដាប់បទសម្ភាស រវាងកញ្ញា ប៉ូ សាគុន ជាមួយលោកឧទ្ទេសាចារ្យ វ៉ាយ វិបុល ដូចតទៅ៖
លោក វ៉ាយ វិបុល ថាដើមចេកស្លឹកត្រចៀកទន្សាយ មានសឹងតែគ្រប់ក្នុងពិធីបុណ្យ ដូចជាពិធីសូត្រមន្តរំដោះគ្រោះ សូត្រមន្តលើករាសី ពិធីបុណ្យពុទ្ធាពិសេក និងពិធីបុណ្យតូចធំជាច្រើនទៀត។ លោកឧទ្ទេសាចារ្យ សន្និដ្ឋានថា តាំងពីដើមឡើយ ដើមចេកស្លឹកត្រចៀកទន្សាយ បានផ្ដល់សេចក្ដីសុខ សុភមង្គល សិរីសួស្ដីគ្រប់ប្រការ និងចម្រុងចម្រើន ទើបបានជាដូនតាខ្មែរ ដាក់ដើមចេកនេះ ស្ទើរតែគ្រប់ពិធីបែបប្រពៃណី និងទំនៀមទម្លាប់បែបនេះ។
លោក វ៉ាយ វិបុល ពន្យល់«មិនឃើញក្នុងគម្ពីរព្រះពុទ្ធសាសនា ឬក្នុងគម្ពីរផ្សេងៗទេ ប៉ុន្តែយើងធ្វើតាមទំនៀមទម្លាប់ ប្រពៃណីបុរាណ។ បើបកស្រាយទៅតាមទស្សនៈផ្សំឱ្យមានហេតុផល ដើមចេកស្លឹកត្រចៀកទន្សាយ ដែលមានស្លឹក៣នោះ គឺតំណាងថាមានលាភជ័យ បានសុខចម្រើន និងភាពយុត្តិធម៌។ បើមើលជាក់ស្ដែង ចេកនៅអាយុប៉ុណ្ណឹងមិនងាយស្វិត ហើយមានសម្រស់ទាក់ភ្នែក»។
លោក ឧទ្ទេសាចារ្យ បានបន្ថែមថា ការតាំងដើមចេកស្លឹកត្រចៀកទន្សាយ ក្នុងពិធីផ្សេងៗ ក៏ដូចជាថ្វាយទេវតា ក្នុងឱកាសពិធីបុណ្យចូលឆ្នាំប្រពៃណីជាតិ គឺតំណាងឱ្យដើមពោធិ ដែលព្រះពុទ្ធបានត្រាស់ដឹង។ ហើយដើមពោធិ ក្នុងព្រះពុទ្ធសាសនា ត្រូវបានតំណាងដោយ វត្ថុគួរគោរព៥ ដោយ១ព្រះពុទ្ធរូប ២ព្រះពោធិព្រឹក ៣ព្រះស្ដូប ឬព្រះចេតិយ ៤ព្រះសារីរិកធាតុ ៥ព្រះធម៌ទាំង៨៤,០០០ព្រះធម្មខណ្ឌ៕
Tag:
វប្បធម៌
ចូលឆ្នាំថ្មី
ទំនៀមទម្លាប់
ប្រពៃណី
© រក្សាសិទ្ធិដោយ thmeythmey.com
