ក្រោយជំនួបរយៈពេល៣ថ្ងៃនៅក្នុងក្រុង Nagano នៅទឹកដីជប៉ុន ក្រុមប្រទេសមានសេដ្ឋកិច្ចរីកចម្រើនទាំង៧ បានចេញសេចក្តីថ្លែងការណ៍រួមមួយ ក្នុងនោះមានការដាក់សម្ពាធលើរុស្ស៊ីផង។ 

 

«យើងបន្តរក្សាការប្តេជ្ញា ដើម្បីបង្កើនការដាក់ទណ្ឌកម្មប្រឆាំងរុស្ស៊ីដោយសម្របសម្រួល និងចាប់បង្ខំឱ្យមានការអនុវត្តពេញលេញ»។ រដ្ឋមន្រ្តីការបរទេសក្រុមប្រទេស G7 បានបញ្ជាក់បែបនេះ នៅក្នុងសេចក្តីថ្លែងការណ៍រួម បន្ទាប់ពីមានកិច្ចប្រជុំមួយនៅថ្ងៃទី១៨ ខែមេសា។ 

 

ទន្ទឹមនេះ ប្រមុខការទូតក្រុមប្រទេសអ្នកមានទាំង៧ បានបន្ថែមថា វាគ្មាននិទណ្ឌភាពចំពោះឧក្រិដ្ឋកម្មសង្រ្គាម និងរបបផ្តាច់ការដែលរុស្ស៊ី បានវាយប្រហារលើប្រជាជនស៊ីវិល និងហេដ្ឋារចនាសម្ព័ន្ធស៊ីវិលឡើយ។ 

 

កន្លងមក ចៅក្រមតុលាការព្រហ្មទណ្ឌអន្តរជាតិ (ICC) បានប្រកាសចេញដីកាចាប់ខ្លួនប្រធានាធិបតីរុស្ស៊ី លោក វ្ល៉ាឌីមៀ ពូទីន ពាក់ព័ន្ធនឹងការនិរទេសកុមារអ៊ុយក្រែន និងឧក្រិដ្ឋកម្មផ្សេងទៀត។

 

ចាប់តាំងពីរុស្ស៊ីឈ្លានពានអ៊ុយក្រែន ក្រុមប្រទេសអ្នកមានទាំង ៧ បានដាក់ទណ្ឌកម្មលើរុស្ស៊ីជាបន្តបន្ទាប់លើវិស័យពាណិជ្ជកម្ម, ថាមពល និងហិរញ្ញវត្ថុជាដើម។ បន្ថែមពីនេះ មេដឹកនាំក្រុមប្រទេស G7 សុទ្ធតែបានធ្វើទស្សនកិច្ចនៅអ៊ុយក្រែន ដើម្បីបង្ហាញការគាំទ្ររបស់ខ្លួនចំពោះរដ្ឋាភិបាលក្រុងកៀវ ប្រឆាំងនឹងរុស្ស៊ី។ 

 

ក្នុងជំនួបនៅទឹកដីជប៉ុននេះ រដ្ឋមន្រ្តីការបរទេសក្រុមប្រទេសមានសេដ្ឋកិច្ចជឿនលឿនទាំង៧ ក៏បានពិភាក្សាពីប្រធានបទតៃវ៉ាន់ និងចិន រួមទាំងកិច្ចសហប្រតិបត្តិការជាមួយក្រុមប្រទេសខាងត្បូងផង៕