ជាតិ
មរតកមនុស្សរស់ ជា យុទ្ធា៖«គេសើចខ្ញុំព្រោះខ្ញុំមិនធ្លាប់ទៅអង្គរ តែខ្ញុំអាចឆ្លាក់ក្បាច់អង្គរបាន»
× ភ្នំពេញ៖ ទេពហត្ថកោសល្យ ជា យុទ្ធា គឺជាជាងចម្លាក់ក្បាច់អង្គរលើស្ពាន់ ដ៏ល្បីល្បាញក្នុងប្រទេសកម្ពុជា។ ដ្បិតតែអាចឆ្លាក់ក្បាច់អង្គរ លើស្ពាន់បានយ៉ាងប្រណីតក្ដី ប៉ុន្តែព្រឹទ្ធាចារ្យវ័យ៦៩ឆ្នាំរូបនេះ ពុំដែលបានទៅឃើញចម្លាក់ នៅលើជញ្ជាំងប្រាសាទអង្គរវត្តផ្ទាល់ សូម្បីតែម្ដង។ អ្វីដែលលោកអាចឆ្លាក់ក្បាច់អង្គរបាន គឺមើលតាមរូបថត។ ដោយហេតុនោះហើយ រាល់ពេលដែលលោកប្រាប់គេថា លោកមិនធ្លាប់បានទៅប្រាសាទអង្គរ គេតែងតែអស់សំណើច។
ដោយសារតែ ទឹកដៃចម្លាក់ក្បាច់អង្គរ លើស្ពាន់ដ៏ចំណាន របស់ព្រឹទ្ធាចារ្យ ជា យុទ្ធា ព្រះករុណាព្រះបាទ នរោត្តម សីហមុនី ព្រះរាជាកម្ពុជា បានប្រោសព្រះរាជទានគោរមងារ ទេពហត្ថកោសល្យ ដល់ព្រឹទ្ធាចារ្យរូបនេះ ដោយឈ្មោះរបស់លោក ត្រូវបានបញ្ជូលទៅក្នុង ប្រព័ន្ធមរតកមនុស្សរស់កម្ពុជាជំនាន់ទី២។
ព្រឹទ្ធាចារ្យ ជា យុទ្ធា ជាងចម្លាក់ក្បាច់អង្គរលើស្ពាន់
សូមស្ដាប់ប្រសាសន៍របស់ព្រឹទ្ធាចារ្យ ជា យុទ្ធា លម្អិត៖
ទោះជាយ៉ាងណាក៏ដោយ ក្នុងជន្មាយុ៦៩ឆ្នាំនេះ ព្រឹទ្ធាចារ្យ ជា យុទ្ធា ពុំដែលបានទៅឃើញក្បាច់អង្គរ ដែលបានឆ្លាក់ នៅលើជញ្ជាំងប្រាសាទអង្គរវត្ត ដោយផ្ទាល់ភ្នែកសូម្បីតែម្ដង។ តាមពិតទៅ មរតកមនុស្សរស់រូបនេះ ចង់ទៅទស្សនាប្រាសាទអង្គរ ពិសេសចង់ទៅមើល សង្កេត ពិនិត្យក្បាច់អង្គរ ដោយផ្ទាល់ភ្នែកណាស់ ប៉ុន្តែដោយសារតែការងារមមាញឹកពេក ទើបលោកដកឃ្លាមិនរួច។
«កាលពីមុនខ្ញុំក្រពេក មិនអាចទៅបាន។ ដល់ពេលនេះមានហើយ ប៉ុន្តែរវល់ដកខ្លួនមិនរួច។ ខ្ញុំចេះតែគិតថា នៅមានកម្លាំងខំធ្វើសិនទៅ ទុកប្រាក់ពេលខ្លួនចាស់។ ខ្ញុំមិនចង់ពឹងកូនទេ គេរកគេចង់មានដែរ យើងនៅរកបានខំសិនទៅ»។ នេះជាការបញ្ជាក់របស់ ជា យុទ្ធា។
ព្រឹទ្ធាចារ្យ ជា យុទ្ធា ជាងចម្លាក់ក្បាច់អង្គរលើស្ពាន់
យ៉ាងណាក៏ដោយ រាល់ពេលដែលលោក ប្រាប់គេថាលោកពុំធ្លាប់បានឃើញក្បាច់អង្គរ ដោយផ្ទាល់ភ្នែក គេតែងតែសើច ក្នុងន័យហួសចិត្ត ដែលលោកអាចឆ្លាក់ក្បាច់អង្គរបាន ដោយគ្រាន់តែមើលតាមរូបភាព ដែលគេថតឱ្យ។ មិនត្រឹមតែឆ្លាក់តែម្នាក់ឯងឡើយ ប៉ុន្តែលោកអាចបង្រៀនសិស្ស ឱ្យចេះឆ្លាក់ក្បាច់នេះថែមទៀតផង។
ទោះជាយ៉ាងណា ទេពហត្ថកោសល្យ ដែលមានសម្បុរស្រអែម អះអាងថា ក្នុងឆ្នាំ២០២៣នេះ លោកមានគម្រោងទៅលេងប្រាសាទអង្គរហើយ ប៉ុន្តែពុំទាន់កំណត់ថ្ងៃខែឡើយ៕
Tag:
សិល្បៈ
វប្បធម៌
ចម្លាក់
អង្គរ
មរតកមនុស្សរស់
© រក្សាសិទ្ធិដោយ thmeythmey.com