អន្តរជាតិ
រុស្ស៊ី ណែនាំពលរដ្ឋខ្លួនចៀសវាងធ្វើដំណើរទៅកាណាដា
× ក្រសួងការបរទេសរុស្ស៊ី បានណែនាំពលរដ្ឋរបស់ខ្លួនឱ្យជៀសវាងការធ្វើដំណើរទៅកាន់កាណាដាដោយបានលើកឡើងពីករណីរើសអើងជាច្រើនប្រឆាំងនឹងជនជាតិរុស្ស៊ីរួមទាំងអំពើហិង្សាលើរាងកាយផងដែរ។
កាណាដា ជាប្រទេសគាំទ្រដែលប្រឆាំងនឹងការឈ្លានពានរបស់រុស្ស៊ីលើអ៊ុយក្រែន និងបានដាក់ចេញទណ្ឌកម្មលើមន្ត្រីរុស្ស៊ី និងក្រុមហ៊ុនរាប់រយ ហើយព្រមទាំងការហាមឃាត់លើពាណិជ្ជកម្មទ្រង់ទ្រាយធំផងដែរ។ សកម្មភាពនេះ ធ្វើឱ្យទំនាក់ទំនងជាមួយរុស្ស៊ី មិនល្អប្រសើរឡើយ។
«ដោយសារករណីជាច្រើននៃការរើសអើងប្រឆាំងនឹងពលរដ្ឋរុស្ស៊ីនៅក្នុងកាណាដារួមទាំងអំពើហិង្សាលើរាងកាយ យើងសូមណែនាំអ្នកឱ្យចៀសវាងការធ្វើដំណើរទៅកាន់ប្រទេសនេះក្នុងគោលបំណងទេសចរណ៍ ការអប់រំ និងក្នុងបរិបទទំនាក់ទំនងអាជីវកម្ម» ។ ក្រសួងការបរទេសរុស្ស៊ីបញ្ជាក់បែបនេះក្នុងសេចក្ដីណែនាំមួយរួចបន្តថា ប្រសិនកំពុងស្ថិតនៅកាណាដារួចហើយនោះ ពួកគេត្រូវប្រុងប្រយ័ត្ន ជាពិសេសនៅទីសាធារណៈ។
សេចក្តីណែនាំខាងលើដែលបានចុះថ្ងៃទី២០ ខែមេសា និងត្រូវបានបង្ហោះនៅលើប្រព័ន្ធបញ្ជូនសារ Telegram សំខាន់របស់ក្រសួងកាលពីថ្ងៃទី២២ ខែមេសា។
ភ្លាមៗបន្ទាប់ពីសង្គ្រាមបានចាប់ផ្តើមកាលពីឆ្នាំមុន កាណាដាក៏បានណែនាំពលរដ្ឋឱ្យចៀសវាងការធ្វើដំណើរទាំងអស់ទៅកាន់រុស្ស៊ីដែរ។ ចំណែកឯរុស្ស៊ីកាលពីសប្តាហ៍មុនបានដាក់ទណ្ឌកម្មលើមន្ត្រីកាណាដានិងឥស្សរជនសាធារណៈចំនួន៣៣៣នាក់ រួមទាំងកីឡាករអូឡាំពិកដ៏លេចធ្លោផងដែរនៅក្នុងអ្វីដែលខ្លួនបាននិយាយថាជាការឆ្លើយតបចំពោះការដាក់កំហិតរបស់កាណាដាលើទីក្រុងមូស្គូ និងការគាំទ្រអ៊ុយក្រែន៕
© រក្សាសិទ្ធិដោយ thmeythmey.com