ការសិក្សាអង្កេតស្រាវជ្រាវ បានបង្ហាញថា មានប្រភេទជំងឺមហារីកខ្លះ គឺហាក់នឹងងាយកើតមានចំពោះមនុស្សមួយចំនួន គឺអាស្រ័យទៅលើកត្តាតំណពូជ។ នេះក៏ព្រោះតែ វាត្រូវបានបង្ហាញថាហ្សែន មានតួនាទីនៅក្នុងការវិវត្តន៍របស់ជំងឺមហារីកមួយចំនួន។
ការសិក្សាក្នុងពេលបច្ចុប្បន្ននេះ បង្ហាញថាតំណពូជគឺមានទំនាក់ទំនងជាខ្លាំងបំផុត ជាមួយនឹងជំងឺមហារីកពោះវៀន, សុដន់ និងជំងឺមហារីកក្រពះ ។ ប្រហែលជា ៥ ទៅ ១០ភាគរយ គឺត្រូវបានគិតថា វាកើតមានដោយសារកត្តាតំណពូជ។ តែទោះជាយ៉ាងណាក៏ដោយ វាត្រូវបានគេដឹងថា មូលហេតុដែលចម្បងជាងគេនៃជំងឺមហារីកភាគច្រើន បណ្តាលមកពីកត្តាមជ្ឈដ្ឋានខាងក្រៅ មានដូចជាការជក់បារី, ការផឹកស្រា,របបអាហារ, ការបង្ករោគ, កាំរស្មី, ថ្នាំ និងសារជាតិគីមីជាដើម។
ជំងឺមហារីកសុដន់ និង កត្តាហ្សែន
វាស្ទើរតែ ២៩០០ករណីនៃជំងឺមហារីកសុដន់ បានកើតមាននៅក្នុងប្រទេសអូស្ត្រាលីជារៀងរាល់ឆ្នាំ ហើយវាគឺជាប្រភេទជំងឺមហារីក ដែលតែងកើតមានជាទូទៅបំផុត ចំពោះស្ត្រីជនជាតិអូស្ត្រាលី។ មាន កត្តាជាច្រើន ដែលបានកំណត់ពី ការប្រឈមនឹងការកើតមាននូវជំងឺមហារីកសុដន់ចំពោះស្ត្រី ហើយ បញ្ហាជាចំបងនោះ គឺអាយុ។ ហើយជំងឺមហារីកអូវែ ក៏ជាកត្តាប្រឈមដ៏សំខាន់មួយទៀត ចំពោះជំងឺ មហារីកសុដន់ផងដែរ។ ប្រហែលជា ១ ក្នុងចំណោម ២០ករណីនៃជំងឺមហារីកសុដន់ គឺអាចរួមចំណែក ពីកត្តាតំណពូជ ។
ជំងឺមហារីកពោះវៀន និងកត្តាហ្សែន
ស្ទើរតែ ៣៥០០ករណី ត្រូវបានធ្វើរោគវិនិច្ឆ័យឃើញថា កើតមាននូវជំងឺមហារីកពោះវៀន នៅក្នុងប្រទេសអូស្ត្រាលីជារៀងរាល់ឆ្នាំ។ វាជាប្រភេទជំងឺមហារីក លំដាប់ទីពីរ បន្ទាប់ពីជំងឺមហារីកក្រពេញ ប្រូស្តាត ក៏ដូចជា ជំងឺមហារីកសុដន់ផងដែរ។ កត្តាប្រឈមនឹងគ្រោះថ្នាក់នេះដ៏ខ្លាំងបំផុតនោះ គឺកត្តាអាយុ ។
ជំងឺមហារីក និង ប្រវត្តិសុខភាពរបស់ក្រុមគ្រួសារ
ប្រសិនបើគ្រួសារអ្នក មានប្រវត្តិជំងឺមហារីកខ្លាំងក្លា នោះជាធម្មតាវាមានន័យថា ប្រភេទនៃជំងឺមហារីកដូចគ្នា បានកើតមានចំពោះសមាជិកក្រុមគ្រួសារអ្នក ជាច្រើនជំនាន់មកហើយ ឬ មានសមាជិកណាម្នាក់ ធ្លាប់បានធ្វើរោគវិនិច្ឆ័យឃើញថា មានជំងឺនេះនៅក្នុងអាយុក្មេង ជាងសភាពធម្មតា។
សម្រាប់អ្នក ដែលជាសមាជិកនៅក្នុងក្រុមគ្រួសារនេះ អាចនឹងត្រូវបានណែនាំឱ្យទៅជួបប្រឹក្សានឹងអ្នកមានជំនាញផ្នែកហ្សែន ដែលជាកន្លែងអាចរាយការណ៍បានពីសមាជិកគ្រួសារណា ម្នាក់ ដែលអាចមានផ្ទុកវា នឹងត្រូវបានពិនិត្យតាមដាន និងប៉ាន់ប្រមាណពីការប្រឈមទៅនឹងជំងឺមហារីកនេះ ។
ប្រសិនបើសមាជិកណាម្នាក់ ត្រូវបានសន្មតថា មានការប្រឈមនឹងគ្រោះថ្នាក់ នៃការកើតមាននូវជំងឺនេះក្នុងកម្រិតខ្ពស់ នោះអ្នកជំនាញអាចនឹង រៀបចំនូវការធ្វើតេស្តតាមដានពិនិត្យ ដើម្បីស្វែងរកពីសញ្ញាណាមួយរបស់ជំងឺមហារីក ឱ្យបានឆាប់រហ័ស តាមដែលអាចធ្វើបាន។
ជំងឺមហារីក ដែលត្រូវបានគេជឿថា មានទំនាក់ទំនងជាមួយនឹងហ្សែន មានដូចជា៖
- ជំងឺមហារីកសុដន់។
- ជំងឺមហារីកពោះវៀន។
- ជំងឺមហារីក ក្រពេញប្រូស្តាត។
- ជំងឺមហារីកក្រពះ៕