លោក ចូ បៃឌិន ប្រធានាធិបតីអាម៉េរិក នៅថ្ងៃទី២៥ ខែមេសា បានប្រកាសឈរឈ្មោះជាប្រធានាធិបតីសម្រាប់អាណត្តិបន្ទាប់ជាផ្លូវការ ដោយស្នើឱ្យអ្នកបោះឆ្នោតផ្តល់ពេលលោកបន្ថែមទៀត មុនពេលបញ្ចប់តំណែងដ៏សំខាន់មួយនេះ។ យ៉ាងណាមិញ បញ្ហាអាយុនៅតែមានការចោទសួរលើលោកបៃឌិន ខណៈពេលបច្ចុប្បន្នលោកមានវ័យ ៨០ឆ្នាំស្រាប់ទៅហើយ។ 

 

ក្នុងសន្និសីទសារព័ត៌មានមួយ នៅថ្ងៃទី២៦ ខែមេសា មេដឹកនាំអាម៉េរិករូបនេះ បានអះអាងថា វាជារឿងធម្មតាទេសម្រាប់ប្រជាជនដែលបានសួរពីអាយុរបស់លោក។ បើតាមលោកបៃឌិន លោកបានគិតពីបញ្ហានេះយ៉ាងខ្លាំង។​ នេះបើតាមការចុះផ្សាយរបស់ទីភ្នាក់ងារព័ត៌មាន AFP។ 

 

បើទោះមានវ័យចាស់ក៏ដោយ ប៉ុន្តែលោកប្រធានាធិបតីនៅតែអះអាងថា លោក នៅតែមានអារម្មណ៍ល្អ។ 

 

«ខ្ញុំមានអារម្មណ៍ល្អ ខ្ញុំពិតជារំភើបសម្រាប់គំនិតមួយនេះ»។ លោកបៃឌិន បានសង្កត់ធ្ងន់បែបនេះ នៅក្នុងសន្និសីទសារព័ត៌មានរួមជាមួយលោកប្រធានាធិបតីកូរ៉េខាងត្បូង យូន សុកយ៉ល នៅថ្ងៃទី២៦ ខែមេសា ដោយបន្តថា ប្រជាជននឹងមើលឃើញពីការប្រកួតប្រជែង ហើយពួកគេនឹងវាយតម្លៃពីសមត្ថភាពរបស់លោក ថាតើអាចបន្ត ឬមិនអាច។ 

 

បើសិនបើលោកបៃឌិន ជាប់ឆ្នោតជាប្រធានាធិបតីនៅអាណត្តិក្រោយក្នុងឆ្នាំ២០២៥ លោកនឹងមានវ័យ៨២ឆ្នាំ ហើយនឹងបញ្ចប់ការកាន់តំណែងដ៏សំខាន់មួយនេះ នៅវ័យ ៨៦ឆ្នាំ។ កន្លងមក លោក រ៉ូណាល់ រីហ្កេន ជាប្រធានាធិបតីអាម៉េរិក ដែលមានវ័យចំណាស់ជាងគេ ដែលបានបញ្ចប់ការកាន់តំណែងនៅវ័យ ៧៧ឆ្នាំ៕