លោក នំ រ៉ាគឺម  បានប្រាប់សារព័ត៌មានថ្មីៗ ថា ហេតុការណ៍នេះបានកើតឡើងចន្លោះពីម៉ោង៩ ដល់ម៉ោង១២យប់ ដោយបុរសម្នាក់បានសន្លប់នៅភ្នំខ្នងផ្សា ហើយបានបញ្ជូនចុះមកវិញ ដើម្បីជួយសង្រ្គោះ ប៉ុន្តែមិនអាចជួយសង្រ្គោះបាន ទើបត្រូវបាត់បង់ជីវិតនៅពេលមកដល់ផ្សារជាំ ដែលមានចម្ងាយប្រមាណ២០គីឡូម៉ែត្រពីខ្នងផ្សា។
 

តាមបើលោក រ៉ាគឺម ទេសចរដែលបានស្លាប់នោះធ្វើដំណើរទៅឡើងភ្នំខ្នងផ្សា ជាលក្ខណៈគ្រួសារ ដែលមានសមាជិក៦នាក់។ លោកបញ្ជាក់ទៀតថា នេះមិនមែនជាលើកទី១របស់ទេសចររូបនោះឡើយ ព្រោះពេលធ្វើដំណើរឡើងភ្នំនោះ គេពុំប្រើប្រាស់សេវានាំភ្ញៀវរបស់សហគមន៍ឡើយ។ «គាត់មកឡើងខ្នងផ្សាហ្នឹង២-៣ដងហើយ មិនមែនលើកទី១ទេ។ ហើយគាត់អត់បានជួលអ្នកនាំភ្ញៀវឱ្យឡើងជាមួយទេ ព្រោះគាត់ស្គាល់។ ខ្ញុំបើកគោយន្តជូនពួកគាត់ត្រឹមជើងភ្នំ នៅម៉ោង៨ជាងព្រឹក ថ្ងៃសៅរ៍ហ្នឹង អត់បានឡើងទៅជាមួយទេ»។ នេះជាការលើកឡើងរបស់លោក រ៉ាគឺម សហគមន៍នាំភ្ញៀវឡើងភ្នំខ្នងផ្សា។
 

លោក រ៉ាគឺម ថា ទេសចររូបនោះ ត្រូវបានជួយសង្រ្គោះដោយភ្ញៀវដែលទៅបោះតង់ដូចគ្នានោះ និងដឹកដោយរថយន្តចុះមកក្រោមភ្លាមៗ ប៉ុន្តែដោយសារឆ្ងាយ ហើយផ្លូវពិបាកផងនោះ ទើបមិនអាចជួយសង្រ្គោះបាន ហើយត្រូវបាត់បង់ជីវិតនៅពេលមកដល់ផ្សារជាំ។ លោកបញ្ជាក់ទៀតថា ទេសចរទាំងនោះបានទៅសម្រាកផ្ទះរបស់លោក មួយយប់ថ្ងៃទី២៨ មេសា ហើយពួកគេមានគម្រោងទៅឡើងភ្នំខ្នងផ្សានេះរយៈពេល២ថ្ងៃទើបចុះមកវិញ៕