ក្រោយពីចាកចេញពីប្រទេសជាច្រើនឆ្នាំ លោក ថាក់ស៊ីន ស៊ីណាវ៉ាត្រា អតីតនាយករដ្ឋមន្រ្តីថៃ បានសរសេរលើបណ្តាសង្គម Twitter នៅព្រឹកថ្ងៃទី១ ខែឧសភា ពីការត្រលប់មកប្រទេសវិញ ក្រោយចៅទី៧ ដែលជាកូនរបស់លោកស្រី Paetongtarn Shinawatra បេក្ខភាពនាយករដ្ឋមន្រ្តីថៃមួយរូបរបស់បក្ស Pheu Thai​ បានចាប់កំណើត។ 

 

«ខ្ញុំនឹងស្នើសុំការអនុញ្ញាតត្រលប់មកថែរក្សាចៅៗ ដោយសារខ្ញុំនឹងមានវ័យ ៧៤ឆ្នាំ នៅក្នុងខែកក្កដាខាងមុខ»។ លោក ថាក់ស៊ីន បានបញ្ជាក់បែបនេះ ដោយបន្តថា ជួបគ្នាឆាប់ៗ។ 

 

អតីតនាយករដ្ឋមន្រ្តីរូបនេះ បានចាកចេញពីប្រទេស តាំងពីចៅចំនួន ៧នាក់ មិនទាន់កើតមកម្លេះ។ ការចាកចេញរបស់លោកថាក់ស៊ីនពីថៃ បានកើតឡើងនៅក្នុងឆ្នាំ ២០០៨ មុនពេលតុលាការប្រកាសសេចក្តីសម្រេច។ 

 

នៅក្នុងឆ្នាំ ២០០៨ តុលាការកំពូល បានកាត់ទោសលោកថាក់ស៊ីនឱ្យជាប់ពន្ធនាគាររយៈពេល ២ឆ្នាំ ពីការប្រឆាំងនឹងច្បាប់ប្រឆាំងអំពើពុករលួយជាតិពីករណីទិញដី នៅក្នុងតំបន់ Ratchadaphisek ក្នុងក្រុងបាងកក។ នេះបើតាមការចុះផ្សាយរបស់កាសែតបាកកកប៉ុស្តិ៍។ 

 

អតីតនាយករដ្ឋមន្រ្តីរូបនេះ រងបទចោទពីការរំលោភអំណាចក្នុងពេលធ្វើជានាយករដ្ឋមន្រ្តី នៅពេលលោកអនុញ្ញាតឱ្យភរិយាចូលរួមការដេញថ្លៃដីចំនួន ៣៣រ៉ៃ ក្នុងតំបន់ Ratchadaphisek ដែលត្រូវបានហាមឃាត់ដោយមូលនិធិអភិវឌ្ឍវិទ្យាស្ថានហិរញ្ញវត្ថុរបស់ធនាគារថៃ។ 

 

ក្រោយបង្កើតបានកូនប្រុសមួយរូប លោកស្រី Paetongtarn បានសរសេរលើបណ្តាញសង្គម Instagram ថា កូនប្រុសរបស់លោកស្រីត្រូវបានដាក់ឈ្មោះថា Phruethasin Suksawat និងមានឈ្មោះហៅក្រៅថាថាក់ស៊ីន៕