ភ្នំពេញ៖ “សៀវភៅមួយ សហគមន៍មួយ” គឺជាយុទ្ធនាការជំរុញការអាន នៅទូទាំង២៥ខេត្តក្រុង ទៅដល់យុវជន កុមារ និងសាធារណជន។ យុទ្ធនាការអាន បានបង្កឱ្យមានការបង្កើតបណ្ណាល័យ នៅតាមតំបន់ដែលយុទ្ធនាការបានទៅដល់ ហើយនោះគឺជាកត្តា ជំរុញការអានរយៈពេលវែង។
លោក សុខ ឡាក់ សហស្ថាបនិកបណ្ណាល័យបញ្ញវន្ត បានប្រាប់សារព័ត៌មានថ្មីៗថា ការបង្កើតបណ្ណាល័យ នៅតាមតំបន់នីមួយៗ ទោះធំក្ដីតូចក្ដី ទោះចល័តឬអចិន្ត្រៃយ៍ក្ដី នឹងជាផ្នែកដ៏សំខាន់ ក្នុងការជំរុញការអានរយៈពេលវែង។ ឆ្លងកាត់ការធ្វើយុទ្ធនាការ ក្នុងខេត្តកំពង់ស្ពឺ និងខេត្តបន្ទាយមានជ័យកន្លងទៅ ឃើញថាបើទោះបីជាយុទ្ធនាការបានបញ្ចប់ហើយក្ដី ប៉ុន្តែនៅតាមបំបន់មួយចំនួននៃខេត្តទាំងពីរនេះ បាននិងកំពុងរៀបចំបណ្ណាល័យ សម្រាប់យុវជន កុមារ និងសាធារណជន បានចូលអាន។
ការរៀបចំសៀវភៅ នៅក្នុងបណ្ណាល័យបញ្ញវន្ត
«ធ្វើបាន២ខេត្តហើយ យើងមានក្ដីសង្ឃឹម ព្រោះនៅកំពុងស្ពឺនៅ ពួកយើងនៅតែធ្វើការជាមួយបណ្ណាល័យនៅទីនោះ រហូតដល់ពេលនេះ។ យុទ្ធនាការបាននាំយកសៀវភៅ ទៅដាក់ក្នុងបណ្ណាល័យច្រើន។ យើងបានបណ្ដុះយុវជនក្នុងខេត្ត ដើម្បីបន្តជំហរជំរុញយុវជនដទៃទៀត ក៏ដូចជាកុមារ ដើម្បីឱ្យពួកគេចាប់អារម្មណ៍ការអាន»។ នេះជាការបញ្ជាក់របស់លោក សុខ ឡាក់។
សហស្ថាបនិកបណ្ណាល័យបញ្ញវន្តរូបនេះសង្ឃឹមថាយុទ្ធនាការ«សៀវភៅមួយ សហគមន៍មួយ» នឹងក្លាយជាចលនាលើកទឹកចិត្តឱ្យមានការបង្កើតបណ្ណាល័យ នៅតាមបណ្ណាខេត្តនានា នៅទូទាំង២៥ខេត្តក្រុង ដែលនេះជាកត្តាជំរុញ ឱ្យមានទម្លាប់ការអាន។ តាមរយៈយុទ្ធនាការនេះ លោកក៏សង្ឃឹមដែរថាយុវជននឹងចាប់ផ្ដើមមានសេរីភាពផ្លូវចិត្ត ក្នុងការអានសៀវភៅនៅទីសាធារណៈ និងនៅគ្រប់ទីកន្លែង។
«នៅកម្ពុជាយើង ប្រជាជនពុំទាន់សូវយល់អំពីការអានច្រើនទេ។ អ្នកខ្លះពេលឃើញយុវជនអាននៅតាមសួន ឬនៅទីសាធារណៈ ពួកគាត់បែរជានិយាយថា ទីនេះឬទីនោះ មិនមែនជាកន្លែងអានសៀវភៅទេ។ ឬនិយាយថាយុវជនទាំងនោះ(ជោរ)ទៅវិញ។ យើងចង់ឱ្យយុវជន មានសេរីភាពអាន នៅគ្រប់ទីកន្លែង។ ការអានសៀវភៅ នឹងជួយកាត់បន្ថយភាពទំនេររបស់សហគមន៍»។
លោក សុខ ឡាក់ សហស្ថាបនិកបណ្ណាល័យបញ្ញវន្ត
បន្ថែមលើការជំរុញការបង្កើតបណ្ណាល័យតាមតំបន់ យុទ្ធានាការ«សៀវភៅមួយ សហគមន៍មួយ» ដែលមានកម្មវិធីប្រកួតប្រជែងការអាននោះ បានផ្ដល់ឱកាសឱ្យយុវជន បញ្ចេញសមត្ថភាព ពាក់ព័ន្ធនឹងចំណេះដឹងអក្សរសាស្ត្រ អក្សរសិល្ប៍ និងចំណេះដឹងទូទៅ រួមទាំងទទួលបានឱកាស ទៅទស្សនកិច្ចនៅប្រទេសជប៉ុនផងដែរ សម្រាប់អ្នកជាប់ជយលាភីវគ្គផ្ដាច់ព្រ័ត្រ គឺវគ្គ»ជើងឯកបំបែកជើងឯក»ផងដែរ។
ទោះជាយ៉ាងណាក៏ដោយ លោក សុខ ឡាក់ ថាយុទ្ធនាការ«សៀវភៅមួយ សហគមន៍មួយ» គឺជាកម្មវិធីថ្មី ដែលខេត្តមួយចំនួនមិនទាន់បានដឹងស៊ីជម្រៅអំពីកម្មវិធីនេះ ដែលជាហេតុនាំឱ្យពុំសូវមានការចាប់អារម្មណ៍ច្រើន ពីអាជ្ញាធរមូលដ្ឋាន និងអ្នកពាក់ព័ន្ធនានា។ ប៉ុន្តែលោក សង្កេតឃើញថា យុវជននៅតាមខេត្តផ្សេងៗ ពួកគេទន្ទឹងរង់ចាំយុទ្ធនាការនេះ ទៅដល់ខេត្តរបស់ពួកគេ។
សៀវភៅនៅក្នុងបណ្ណាល័យបញ្ញវន្ត
លោក សុខ ឡាក់ អះអាង៖«គម្រោង “សៀវភៅមួយ សហគមន៍មួយ” គឺជាគម្រោងរយៈពេលវែង របស់បណ្ណាល័យបញ្ញវន្ត។ យើងប្រឈមខ្លាំង ចំពោះការរកដៃគូសហការ តាមសហគមន៍នានា។ យុទ្ធនារការរបស់យើង គឺចង់ឱ្យយុវជនបណ្ដុះបណ្ដាលយុវជនដទៃទៀត ឱ្យចាប់អារម្មណ៍ការអាន»។
លោក សុខ ឡាក់ សំណូមពរដល់អាជ្ញាធរមូលដ្ឋាន និងអ្នកពាក់ព័ន្ធទាំងអស់ នៅគ្រប់តំបន់និងភូមិសាស្ត្រ ជួយគាំទ្រយុទ្ធនាការ “សៀវភៅមួយ សហគមន៍មួយ” ដើម្បីរៀបចំយុទ្ធនាការឱ្យបានរលូន និងជោគជ័យ៕