ឥណ្ឌូណេស៊ី នៅថ្ងៃទី២ ខែឧសភា បានរៀបចំពិធីបញ្ជូនអត្តពលិកចំនួន៥៩៩នាក់ រួមទាំងគ្រូបង្វឹក មន្រ្តី និងក្រុមគាំទ្រចំនួន២៣០នាក់មកកម្ពុជា ដើម្បីចូលរួមក្នុងព្រឹត្តិការណ៍កីឡាស៊ីហ្គេមឆ្នាំ២០២៣ ក្នុងកីឡាចំនួន ៣១ប្រភេទ។ 

 

ក្នុងពិធីនេះ លោក ចូកូ វីដូដូ ប្រធានាធិបតីឥណ្ឌូណេស៊ី បានដាក់គោលដៅយកមេដាយមាសចំនួន ៦៩គ្រឿងបន្ថែម ពោលគឺដូចចំនួនឥណ្ឌូណេស៊ីទទួលបានក្នុងព្រឹត្តិការណ៍កីឡាស៊ីហ្គេមនៅវៀតណាម ក្នុងឆ្នាំ២០២២។ 

 

«យើងត្រូវតែសម្រេចបន្ថែមទៀត។ ខ្ញុំស្នើឱ្យអ្នកយកមេដាយមាសចំនួន ៦៩គ្រឿង ហើយអ្នកមានជម្រើសពីរ ដើម្បីសម្រេចបានចំណាត់ថ្នាក់ទទួលបានមេដាយ ពោលគឺបើមិនលេខមួយ ឬលេខពីរ»។ លោកវីដូដូ បានបញ្ជាក់បែបនេះ ក្នុងពិធីជូនដំណើរអត្តពលិក និងមន្រ្តីរបស់ខ្លួនមកកម្ពុជា នៅMerdeka Palace។ ក្នុងព្រឹត្តិការណ៍កីឡាស៊ីហ្គេមនៅវៀតណាម ឥណ្ឌូណេស៊ី មានចំណាត់ថ្នាក់ទទួលបានមេដាយទី៣ ដោយនៅពីក្រោយវៀតណាម និងថៃ។ 

 

សូមបញ្ជាក់ថា កម្ពុជា នឹងរៀបចំពិធីបើកផ្លូវការការប្រកួតកីឡាស៊ីហ្គេមលើកទី៣២ ដែលនឹងធ្វើឡើងនៅពហុកីឡដ្ឋានជាតិមរតតេជោ នៅថ្ងៃទី៥ ខែឧសភា ឆ្នាំ២០២៣ ខាងមុខ៕