ដោយឡែកជុំទី២ សៅ ហៀង ប្រើពេលត្រឹម ២៦.៤៧វិនាទីប៉ុណ្ណោះ ពោលគឺលឿនជាងជុំទី១ ខណៈ កីឡាករឡាវប្រើពេលរហូតដល់ ៥០.៤៣ វិនាទី។ តាមរយៈជ័យជម្នះនេះ លោក ធិន វិចិត្រ មានគម្រោងបញ្ជូនកីឡាករកម្ពុជារួបនេះ ទៅប្រកួតបន្តនៅកម្រិតពិភពលោក Ninja Warrior ដើម្បីមានឱកាសប្រកួតប្រជែងឱ្យបានច្រើន។ អគ្គលេខាធិការកីឡាឧបសគ្គកម្ពុជា ថ្លែងបែបនេះ ទៅកាន់ក្រុមអ្នកសារព័ត៌មានបន្ទាប់ពីបញ្ចប់ការប្រកួត៖ «សម្រាប់ថ្ងៃនេះ អុល សៅហៀង ធ្វើបានល្អបំផុត លើសការរំពឹងទុករបស់យើង!»។

 

គម្រោងបញ្ជូន សៅ ហៀង ទៅកាន់ការប្រកួតកម្រិតពិភពលោកនេះ ក្រោយលោក វិចិត្រ មើលឃើញពីសមត្ថភាពរបស់កូនក្រុមខ្លួន ទាំងកាយសម្បទា និងកម្លាំង។ លើសពីនេះអគ្គលេខាធិការរូបនេះ ក៏មើលឃើញពីភាពរីកចម្រើនលឿនរហ័សរបស់ សៅ ហៀង ទាំងនៅពេលហ្វឹកហាត់និងពេលប្រកួត។

 

កីឡាករកម្ពុជាហ្វឹហាត់ប្រមាណ៥ខែប៉ុណ្ណោះ តែអាចលេងបានល្អ។ ជាក់ស្ដែង លោកពន្យល់ថា កម្ពុជាខ្វះកន្លែងហ្វឹហាត់ ខ្វះឧបករណ៍ ហើយការហាត់ត្រៀមពេញលេញកន្លងមកមានប្រមាណ២ខែប៉ុណ្ណោះ ដែលកីឡាករកម្ពុជាបានទៅហាត់នៅប្រទេសភីលីពីនផងដែរ។ លោក ធិន វិចិត្រ បញ្ជាក់បែបនេះ៕