អន្តរជាតិ
រដ្ឋមន្ត្រីហិរញ្ញវត្ថុអាមេរិក ព្រមានពីមហន្តរាយហិរញ្ញវត្ថុ បើមិនបង្កើនពិដានប្រាក់បំណុល
រូបឯសារ៖ រដ្ឋមន្ត្រីក្រសួងហិរញ្ញវត្ថុអ្នកស្រី Janet Yellen ថ្លែងនៅសាកលវិទ្យាល័យ Johns Hopkins នៃការសិក្សាអន្តរជាតិជាន់ខ្ពស់នៅរដ្ឋធានីវ៉ាស៊ីនតោនកាលពីថ្ងៃទី២០ មេសា ឆ្នាំ២០២៣។
×![]()
ដោយ: VOA
រដ្ឋមន្ត្រីក្រសួងហិរញ្ញវត្ថុសហរដ្ឋអាមេរិកលោកស្រី Janet Yellen បានព្រមានកាលពីថ្ងៃអាទិត្យពីមហន្តរាយហិរញ្ញវត្ថុនិងសេដ្ឋកិច្ចរបស់សហរដ្ឋអាមេរិក និងសេដ្ឋកិច្ចពិភពលោក ប្រសិនបើប្រធានាធិបតីសហរដ្ឋអាមេរិកលោក Joe Biden និងសភា មិនឯកភាពគ្នាលើការបង្កើនប្រាក់បំណុលអាមេរិកដែលបានឡើងដល់កម្រិតទាល់ហើយនោះ ដែលការណ៍ធ្វើដូចនេះអាចជួយឱ្យរដ្ឋាភិបាលអាមេរិកបន្តមានប្រាក់ដើម្បីបង់ថ្លៃសេវាផ្សេងៗរបស់ខ្លួន។
លោកស្រី Yellen បានប្រាប់កម្មវិធី “This Week” របស់ទូរទស្សន៍ ABC ថា «ដើមខែមិថុនាខាងមុខនេះជាពេលវេលាដែលយើងអស់លុយ»ដើម្បីបង់ថ្លៃសេវាផ្សេងៗហើយ បើទោះបីជាលោកស្រីមិនបានបញ្ជាក់ថាថ្ងៃណាពិតប្រាកដមួយ ដែលថារឿងនេះនឹងអាចកើតមានឡើងក៏ដោយ។
ក្រសួងហិរញ្ញវត្ថុសហរដ្ឋអាមេរិកបានចាត់វិធានការចាំបាច់មួយចំនួនរួចហើយ ដើម្បីបន្តការសងបំណុលនោះ ចាប់តាំងពីវាឡើងដល់ចំណុចកំណត់ខ្ចី៣១,៤លានលានដុល្លារកាលពីខែមករាកន្លងទៅនេះ។ លោកស្រីបន្ថែមទៀតថា«លទ្ធភាពរបស់យើងក្នុងការធ្វើដូចនេះជិតអស់ហើយ ហើយសាច់ប្រាក់យើងកាន់តែខើចទៅៗហើយដែរ។ ថ្ងៃនោះវានឹងកើតឡើងនៅពេលដែលយើងអស់លុយបង់ថ្លៃសេវាផ្សេងៗ»។
លោក Biden បានអញ្ជើញមេដឹកនាំសភាអាមេរិកមកកាន់សេតវិមាននៅថ្ងៃអង្គារស្អែកនេះ ដើម្បីពិភាក្សាគ្នា ដើម្បីបញ្ជៀសវិបត្តិដែលនឹងជិតកើតឡើងនេះ។
ប្រធានាធិបតីអាមេរិកខាងគណបក្សប្រជាធិបតេយ្យរូបនេះ បានអំពាវនាវដល់សភាអាមេរិកអស់ពេលជាច្រើនខែមកហើយ ដែលក្នុងនោះក៏មានរដ្ឋសភាអាមេរិកផងដែរ ដែលគ្រប់គ្រងដោយគណបក្សសាធារណរដ្ឋក្នុងសំឡេងលើសបន្តិចនោះ ឱ្យបង្កើនពិដានប្រាក់បំណុលនេះបន្ថែមទៀត ដោយគ្មានដាក់លក្ខខណ្ឌណាមួយ។
ប៉ុន្តែរដ្ឋសភាដែលដឹកនាំដោយគណបក្សសាធារណរដ្ឋ កាលពីខែមុនបានយល់ព្រមបង្កើនពិដានប្រាក់បំណុលសម្រាប់រយៈពេល១ឆ្នាំទៀត ដោយចងភ្ជាប់ជាមួយនឹងការកាត់បន្ថយការចំណាយជាទូទៅរបស់រដ្ឋាភិបាល សម្រាប់កម្មវិធីសង្គម និងវិធានការគ្រប់គ្រងការប្រែប្រួលអាកាសធាតុ ដែលលោក Biden និងក្រុមសមាជិកសភាខាងគណបក្សប្រជាធិបតេយ្យប្រឆាំង៕
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
4 ថ្ងៃ
