អន្តរជាតិ
បារាំង និងចិន ឯកភាពពង្រឹងទំនាក់ទំនងសេដ្ឋកិច្ច
× រដ្ឋមន្រ្តីការបរទេសបារាំង លោកស្រី Catherine Colonna និងសមភាគីចិន លោក ឈីន កាង បានឯកភាពពីភាពចាំបាច់ក្នុងការអភិវឌ្ឍទំនាក់ទំនងសេដ្ឋកិច្ចឱ្យកាន់តែមានតុល្យភាព និងកាន់តែរឹងមាំ។
ក្នុងដំណើរទស្សនកិច្ចនៅបារាំងនៅថ្ងៃទី១០ ខែឧសភា លោក ឈីន កាង ប្រមុខការទូតចិន បានជួបជាមួយសមភាគីបារាំង លោកស្រី Catherine Colonna ដើម្បីជជែកពីបញ្ហាអ៊ុយក្រែន កិច្ចសហប្រតិបត្តិការទ្វេភាគី និងការពង្រឹងសេដ្ឋកិច្ចជាដើម។
សម្រាប់ជំនួបទ្វេភាគីនេះ ប្រមុខការទូតទាំងពីរ បានឯកភាពពីភាពចាំបាច់ ក្នុងការអភិវឌ្ឍទំនាក់ទំនងសេដ្ឋកិច្ចឱ្យកាន់តែរឹងមាំ និងមានតុល្យភាព។ បន្ថែមពីសេដ្ឋកិច្ច លោក ឈីន បានទទូចឱ្យបារាំងសហការជាមួយខ្លួនលើវិស័យផ្សេងៗ និងដូចជាពង្រឹងលើការកសាងច្រវាក់ផលិតកម្ម។ នេះបើតាមការចុះផ្សាយរបស់ទីភ្នាក់ងារព័ត៌មាន Reuters។
បើតាមលោក ឈីន ចិន ប្តេជ្ញាក្នុងការលើកតម្កើងការអភិវឌ្ឍប្រកបដោយគុណភាពខ្ពស់ និងការបើកចំហសេដ្ឋកិច្ចដោយគ្មានការរាថយ រួមទាំងមានឆន្ទៈធ្វើការជាមួយបារាំង និងប្រទេសផ្សេងទៀតនៅលើពិភពលោក។
ជាការឆ្លើយតប រដ្ឋមន្រ្តីការបរទេសចិន បានអះអាងថា ទំនាក់ទំនងចិន និងបារាំង គឺពិតជាសំខាន់ណាស់ ដោយប្រទេសទាំងពីរ គួរតែរួមគ្នា ដើម្បីអភិវឌ្ឍទំនាក់ទំនងទ្វេភាគី។ បន្ថែមពីនេះ លោកស្រី Colonna បានអះអាងថា ប្រទេសទាំងពីរ គួរតែពង្រឹងកិច្ចសហប្រតិបត្តិការលើវិស័យបម្រែបម្រួលអាកាសធាតុ, ថាមពល និងជីវចម្រុះជាដើម។
ជុំវិញបញ្ហាអ៊ុយក្រែន លោកស្រី Colonna បានអះអាងថា ចិនមានតួនាទីដ៏សំខាន់ ក្នុងការបញ្ចុះបញ្ចូលឱ្យរុស្ស៊ីត្រលប់ទៅគោរពធម្មនុញ្ញអង្គការសហប្រជាជាតិ ក៏ដូចជាគោរពអធិបតេយ្យ និងបូរណភាពដែនដីរបស់អ៊ុយក្រែន។ ចំណែករដ្ឋមន្រ្តីការបរទេសចិនវិញ បានអះអាងថា ចិនប្តេជ្ញាក្នុងការដោះស្រាយវិបត្តិអ៊ុយក្រែន បន្តរក្សាទំនាក់ទំនងជាមួយភាគីទាំងអស់ និងដើរតួនាទីប្រកបដោយការស្ថាបនា៕
© រក្សាសិទ្ធិដោយ thmeythmey.com