តាមសេចក្តីថ្លែងការណ៍របស់ប្រធានផ្លាស់វេនអាស៊ាន ចេញនៅថ្ងៃទី១១ ខែឧសភា រដ្ឋអាស៊ាន បានបញ្ជាក់ជាថ្មីលើការហាមឃាត់តំបន់អាស៊ីអាគ្នេយ៍មិនឱ្យមានអាវុធនុយក្លេអ៊ែរ។ 

 

«យើង អះអាងជាថ្មីពីការប្តេជ្ញារក្សាតំបន់អាស៊ីអាគ្នេយ៍ ជាតំបន់គ្មានអាវុធនុយក្លេអ៊ែរ និងគ្មានអាវុធបំផ្លាញទ្រង់ទ្រាយធំទាំងអស់ ដូចដែលមានចែងក្នុងសន្ធិសញ្ញា SEANWFZ និងធម្មនុញ្ញអាស៊ាន»។ សេចក្តីថ្លែងការណ៍របស់ប្រធានអាស៊ាន ចេញនៅថ្ងៃទី១១ ខែឧសភា បានបញ្ជាក់បែបនេះ។ 

 

សន្ធិសញ្ញាតំបន់អាស៊ីអាគ្នេយ៍គ្មានអាវុធនុយក្លេអ៊ែរ ដែលចូលជាធរមាននៅក្នុងឆ្នាំ១៩៩៧ មិនអនុញ្ញាតឱ្យតំបន់អាស៊ីអាគ្នេយ៍អភិវឌ្ឍ ផលិត ទទួល និងកាន់កាប់ ឬគ្រប់គ្រងអាវុធនុយក្លេអ៊ែរឡើយ។ បន្ថែមពីនេះ សន្ធិសញ្ញាដដែល បានហាមឃាត់ការដឹកជញ្ជូន ការផ្ទុក សាកល្បង ឬប្រើប្រាស់អាវុធនុយក្លេអ៊ែរ ដោយមធ្យោបាយណាមួយនោះឡើយ។

 

បន្ថែមពីនេះ សមាជិកអាស៊ាន បានទទូចជាថ្មីឱ្យប្រទេសកាន់កាប់អាវុធនុយក្លេអ៊ែរ ចុះហត្ថលេខាលើពិធីសារសន្ធិសញ្ញាតំបន់អាស៊ីអាគ្នេយ៍គ្មានអាវុធនុយក្លេអ៊ែរផង។ យ៉ាងណាមិញ មកទល់ពេលនេះ វាមិនទាន់មានរដ្ឋកាន់កាប់អាវុធនុយក្លេអ៊ែរណាមួយ ចុះហត្ថលេខាលើពិធីសារនេះឡើយ។ 

 

ពេលនេះ អាស៊ាន កំពុងពិភាក្សាជាមួយរដ្ឋកាន់កាប់អាវុធនុយក្លេអ៊ែរទាំង៥ ដូចជា ចិន អាម៉េរិក អង់គ្លេស បារាំង និងរុស្ស៊ី ជុំវិញលទ្ធភាពនៃការចុះហត្ថលេខា និងផ្តល់សច្ចាប័នលើពិធីសារសន្ធិសញ្ញាតំបន់អាស៊ីអាគ្នេយ៍គ្មានអាវុធនុយក្លេអ៊ែរ ដោយគ្មានលក្ខខណ្ឌ។ 

 

ពិធីសារនៃសន្ធិសញ្ញា SEANWFZ ជាការផ្តល់ការធានាផ្នែកច្បាប់ ដើម្បីប្រាកដថារដ្ឋកាន់កាប់អាវុធនុយក្លេអ៊ែរ មិនប្រើប្រាស់អាវុធនុយក្លេអ៊ែរ ក្នុងការគំរាមកំហែងចំពោះរដ្ឋជាសមាជិកសន្ធិសញ្ញា៕