ទីប្រមូលផ្ដុំលទ្ធផលកំណាយបុរាណវិទ្យា រួមមានរូបបដិមា ចម្លាក់ អលង្ករណ៍ កុលាល​ភាជ​ន៍ លលាដ៍ក្បាលមនុស្សរាប់រយ​ ដែលកប់នៅក្រោមដី តាំងពីសម័យបុរេ​ប្រវត្តិ​សា​ស្ត្រ​មក បានកំពុងដាក់បង្ហាញ ដល់សារធារណជនបានស្គាល់ និងឈ្វេងយល់។ ទីនេះ​ជា​សារ​មន្ទីរព្រះនរោត្ដមសីហនុ-អង្គរ។ 
 

ស្ថិតនៅតាមបណ្ដោយផ្លូវអប្សរា ជាប់នឹងសាលាខេត្តសៀមរាបនោះ ជាអគារ​សារមន្ទីរ​ដែល​យើងកំពុងតែនិយាយនេះ ដោយអគារធំមួយ ត្រូវបានសង់ឡើងនៅលើផ្ទៃដី​ដ៏ទូ​លាយ ជាមួយផ្លូវចូលអមដោយរុក្ខជាតិបៃតង និងបានបើកសម្ពោធជាផ្លូវការ​ក្នុ​​​ងឆ្នាំ២០០៨​។ 
 

សារមន្ទីរមួយនេះ បង្កើតឡើងបន្ទាប់ពីគម្រោងកំណាយវត្ថុបុរាណទ្រទ្រាយធំមួយ នៅឯ​ប្រាសាទបន្ទាយក្ដី ក្នុងឆ្នាំ២០០០ និង២០០១។ ខ្ញុំសូមរំឭកបន្តិចថា​ ក្នុងគម្រោង​កំណាយ​នោះ បុរាណវិទូប្រទះឃើញនូវពុទ្ធបដិមាកប់ក្រោមដី ចំនួន២៧៤អង្គ និងបំណែក។
 

តើលោកអ្នកអាចទស្សនាអ្វីខ្លះនៅទីនេះ? នៅសារមន្ទីរព្រះនរោត្ដមសីហនុ-អង្គរ លោកអ្នកនឹងបានទស្សនានូវវត្ថុសិល្បៈបុរាណប្លែកៗពគ្នា​ ដែលធ្លាប់បានកាប់ក្រោមដី ដែលមនុស្សភាគច្រើនធ្លាប់ឮធ្លាប់ដឹង និងនឹកភ្នកដល់។ នៅទីនេះត្រូវបានបែកចែកជា២ជាន់ ដោយពិព័រណ៍នូវសម័យបុរេប្រវត្តិសាស្ត្រ កំណាយនៅស្ថានីយ៍កោះតាមាស, សម័យអង្គរ នៅប្រាសាទបន្ទាយក្ដី និងសម័យក្រោយអង្គរ នៅប្រាសាទគោកប៉ាទ្រី ជាដើម។ 
 

គួរជម្រាបផងដែរថា នៅសារមន្ទីរព្រះនរោត្ដមសីហនុ-អង្គរ បើក​៦ថ្ងៃ ក្នុងមួយសប្តាហ៍ គឺ​ចាប់ពី​ថ្ងៃអង្គារ៍ ដល់ថ្ងៃអាទិត្យ ចាប់ពីម៉ោង៨ និង៣០នាទីព្រឹក ដល់ម៉ោង៤ និង​៣០​នាទីរសៀល។ ចំពោះតម្លៃសំបុត្រ គឺមានតម្លៃ១ពាន់រៀល សម្រាប់ភ្ញៀវជាជនជាតិខ្មែរ និង​តម្លៃ ៣ដុល្លារ​សម្រាប់ភ្ញៀវបរទេស។ 
 

ជាមួយគ្នានេះ សម្រាប់កុមារអាយុក្រោម១២ឆ្នាំ ព្រះសង្ឈ និងកងកម្លាំងប្រដាប់អាវុធ ការចូលទស្សនាសារមន្ទីរ មិនត្រូវបានគិតថ្លៃនោះឡើយ និងមិនគិតថ្លៃសម្រាប់ភ្ញៀវខ្មែរ នៅរៀងរាល់ថ្ងៃសៅរ៍ នៃដើមខែនីមួយៗ៕