បោះឆ្នោត
អន្តរជាតិ
បក្សភឿថៃ អំពាវនាវឱ្យបក្សភូមិចៃថៃ និងប្រជាធិបតេយ្យគាំទ្រលោក Pita ជានាយករដ្ឋមន្រ្តី លោកស្រី Paetongtarn Shinawatra (ខាងឆ្វេង) និងលោក Srettha Thavisin បេក្ខជននាយករដ្ឋមន្រ្តីបក្ស Pheu Thai។ រូបភាព AFP
× បេក្ខជននាយករដ្ឋមន្រ្តីបក្សភឿថៃ លោក Srettha Thavisin នៅថ្ងៃទី១៥ ខែឧសភា បានជំរុញឱ្យបក្សភូមិចៃថៃ និងប្រជាធិបតេយ្យ បោះឆ្នោតគាំទ្រ លោក Pita Limjaroenrat មេដឹកនាំបក្សឆ្ពោះទៅមុខ ធ្វើជានាយករដ្ឋមន្រ្តីថៃទី៣០ នៅក្នុងកិច្ចប្រជុំសភាខាងមុខ។
តាមរយៈសំណេរដ៏វែងលើបណ្តាញសង្គម Twitter នៅថ្ងៃទី១៥ ខែឧសភា លោក Srettha Thavisin បេក្ខជននាយករដ្ឋមន្រ្តីបក្ស Pheu Thai បានសរសើរបក្សឆ្ពោះទៅមុខពីសន្ទុះនៃការគាំទ្ររបស់ប្រជាជន បើធៀបនឹងឆ្នាំ២០១៩ ដែលមាន៨១កៅអី ទៅ១៥១កៅអី នៅក្នុងឆ្នាំ២០២៣។ បើតាមលោក Srettha កន្លងមក បក្សបក្សភូមិចៃថៃ និងប្រជាធិបតេយ្យ បានបង្ហាញការមិនពេញចិត្តចំពោះរដ្ឋធម្មនុញ្ញ ដែលអនុញ្ញាតឱ្យសមាជិកព្រឹទ្ធបោះឆ្នោតរើសនាយករដ្ឋមន្រ្តី។
«ពេលនេះ វាបានមកដល់ហើយសម្រាប់អ្នកទាំងអស់គ្នា ដើម្បីរក្សាការសន្យាក្នុងការបោះឆ្នោតគាំទ្រលោក Pita ដោយផ្អែកទៅតាមប្រព័ន្ធប្រជាធិបតេយ្យពិតប្រាកដ»។ លោក បេក្ខជននាយករដ្ឋមន្រ្តីបក្ស Pheu Thai បានសង្កត់ធ្ងន់បែបនេះ ដោយបន្តថា បក្សទាំងពីរ និងសមាជិកសភាបក្សទាំងពីរ មិនត្រូវរង់ចាំសមាជិកព្រឹទ្ធសភាឡើយ ដើម្បីឱ្យថៃមានប្រមុខរដ្ឋាភិបាល ដែលត្រៀមខ្លួនរួចរាល់ ក្នុងការផ្លាស់ប្តូរប្រទេស និងសុភមង្គលរបស់ប្រជាជន។
ត្រង់ចំណុចនេះ លោក Srettha យល់ថា អ្វីដែលបក្សទាំងពីរសម្រេចចិត្តក្នុងថ្ងៃនេះ វានឹងជះឥទ្ធិពលដល់ការវាយតម្លៃរបស់ប្រជាជននៅថ្ងៃអនាគតលើបក្ស។
មុនក្លាយជានាយករដ្ឋមន្រ្តីថៃ លោក Pita ត្រូវបានការយល់ព្រមពីសមាជិកសភាទាំងពីរថ្នាក់រដ្ឋសភា និងព្រឹទ្ធសភាយ៉ាងហោចណាស់ ៣៧៦នាក់ ក្នុងចំណោម ៧៥០នាក់។ សមាជិកព្រឹទ្ធសភាភាគច្រើន ត្រូវបានតែងតាំងដោយក្រុមប្រឹក្សាជាតិសម្រាប់សន្តិភាព និងសណ្តាប់ធ្នាប់ (NCPO) ដែលដឹកនាំដោយយោធា៕
© រក្សាសិទ្ធិដោយ thmeythmey.com