មេដាយមាសចំនួន៨១ពីព្រឹត្តិការណ៍ឆ្នាំ២០២៣តែមួយនេះ គឺមានចំនួនច្រើនជាងការទទួលបានពីវត្តមានចូលរួមចំនួន២១លើកកន្លងមករបស់កម្ពុជាក្នុងស៊ីហ្គេម ពោលបើគិតចាប់តាំងពីឆ្នាំ១៩៦១មក។ ពីព្រឹត្តិការណ៍ឆ្នាំ១៩៦១នៅក្រុងរ៉ងហ្គូន ប្រទេសភូមា (មីយ៉ាន់ម៉ា) ដល់ឆ្នាំ២០២១ (លើកទៅរៀបចំនៅឆ្នាំ២០២២ ដោយសារកូវីដ-១៩) នៅហាណូយ ប្រទេសវៀតណាម កម្ពុជា ទទួលបានមេដាយមាសសរុប៧៨ ប្រាក់១២៨ សំរឹទ្ធ២៩៩។ នេះបើផ្អែកតាមទិន្នន័យពីការិយាល័យសហព័ន្ធកីឡាស៊ីហ្គេម (SEA Games Federation Office)។

 

កម្ពុជាស្ថិតក្នុងចំណោមប្រទេសស្ថាបនិកចំនួន៦  នៃព្រឹត្តិការណ៍កីឡាឧបទ្វីបអាស៊ី-អាគ្នេយ៍ (SEAP Games) ដែលក្រោយមកជាកីឡាអាស៊ី-អាគ្នេយ៍ (SEA Games/ស៊ីហ្គេម)។ ប៉ុន្តែសម្រាប់ព្រឹត្តិការណ៍ដំបូងនៅឆ្នាំ១៩៥៩នៅក្រុងបាងកក ប្រទេសថៃ កម្ពុជាមិនមានវត្តមាននោះឡើយ ដោយត្រូវរង់ចាំរហូតដល់ឆ្នាំ១៩៦១ ដែលរៀបចំនៅក្រុងរង់ហ្គូន។

 

ពីឆ្នាំ១៩៦១ ដល់ឆ្នាំ២០២៣ កម្ពុជា បានចូលរួមសរុប២២លើក ដោយបានអាក់ខាននាសម័យខ្មែរក្រហម ហើយឆ្លៀតចូលរួមបាន៣លើកនៅសម័យសាធារណរដ្ឋប្រជាមានិតកម្ពុជា។ ចាប់តាំងព្រឹត្តិការណ៍ឆ្នាំ១៩៩៥នៅឈៀងម៉ៃ ប្រទេសថៃ កម្ពុជាបានបង្ហាញវត្តមានជាទៀងទាត់ឡើងវិញ។

 

នៅមុនកម្ពុជាធ្វើជាម្ចាស់ផ្ទះលើកដំបូង ក្រោយរង់ចាំអស់៦៤ឆ្នាំ កំណត់ត្រាដ៏ល្អបំផុតគឺនៅឆ្នាំ១៩៧១នាក្រុងគូឡាឡាំពួរ ដោយនៅកាលណោះ កម្ពុជាឈ្នះមេដាយមាស១៧ ប្រាក់១៨ សំរឹទ្ធ១៨។ ក្រោយរបបខ្មែរក្រហម ព្រឹត្តិការណ៍ស៊ីហ្គេមលើកទី៣១នៅហាណូយ គឺជាកំណត់ត្រាដ៏ខ្ពស់ជាងគេ ដោយបានឈ្នះមេដាយមាស៩ ប្រាក់១៣ សំរឹទ្ធ១១៕