ចាប់ពីឆ្នាំ២០១៧ មក តៃវ៉ាន់ ត្រូវបានផាត់ចេញពីកិច្ចប្រជុំមហាសន្និបាតសុខាភិបាលពិភពលោក ដោយសារតែចិនជំទាស់។ ជាច្រើនឆ្នាំមកនេះ តៃវ៉ាន់ប្រឹងបង្កើនកិច្ចខិតខំផ្នែកការទូតដើម្បីអាចចូលរួមក្នុងកិច្ចប្រជុំដ៏សំខាន់នេះ។ សម្រាប់ឆ្នាំ២០២៣ កិច្ចប្រជុំនឹងចាប់ផ្ដើមនៅថ្ងៃទី២១ ខែឧសភា ប៉ុន្តែតៃវ៉ាន់នៅតែមិនទាន់បានការអញ្ជើញដដែល ខណៈមានការគាំទ្រកាន់តែច្រើន

 

ក្នុងសន្និសីទកាសែតថ្ងៃទី១៨ ខែឧសភា រដ្ឋមន្រ្តីការបរទេសតៃវ៉ាន់ Joseph Wu បានលើកឡើងពីការគាំទ្ររបស់ប្រទេសដែលមានទំនាក់ទំនងការទូតជាមួយតៃវ៉ាន់ និងប្រទេសជាមិត្តខ្លះដែលចង់ឃើញតៃវ៉ាន់ចូលរួមប្រជុំជាអ្នកសង្កេតការណ៍ ឬក៏តាមទម្រង់ទ្វេភាគីនៅក្រៅកិច្ចប្រជុំនៅទីក្រុងហ្សឺណែវ។ បើតាមលោក Wu តៃវ៉ាន់មានការគាំទ្រខ្លាំងជាងពីមុន។

 

«ទោះបីយើងមិនទាន់ទទួលបានការអញ្ជើញសម្រាប់សន្និបាតឆ្នាំនេះ យើងមិនបោះបង់ឡើយ ហើយបន្តតាមរយៈច្រកនានាដើម្បីបង្ហាញការទាមទារទៅកាន់ WHO ។» លោក Wu អះអាងបែបនេះ។

 

តាមពិតទៅ តៃវ៉ាន់ ត្រូវបានហាមចូលរួមវេទិការបស់អង្គការអន្តរជាតិជាច្រើន មិនត្រឹមកិច្ចប្រជុំរបស់ WHO ឡើយ ព្រោះចិនជំទាស់ក្រោមហេតុផលថា តៃវ៉ាន់ជាផ្នែកមួយរបស់ចិន។ ប៉ុន្តែតៃវ៉ាន់មិនដែលទទួលយកការអះអាងនេះឡើយ។ ទោះយ៉ាងណា​ តៃវ៉ាន់ក៏ត្រូវបានអនុញ្ញាតឱ្យចូលប្រជុំកម្រិតបច្ចេកទេសខ្លះដែរ។

 

កាលពីដើមខែនេះ ប្រមុខការទូតអាម៉េរិក អាន់តូនី ប្លីងខិន ក៏បង្ហាញជំហរចង់ឱ្យតៃវ៉ាន់មានវត្តមានក្នុងសន្និបាតរបស់​ WHO ដែរ តែត្រូវបានចិនប្រតិកម្មយ៉ាងខ្លាំង៕