ក្រោយពីពិនិត្យពាក្យស្នើសុំរួចរាល់ លោក ប្រាជ្ញ ចន្ទ ប្រធានគណៈកម្មាធិការជាតិរៀបចំការបោះឆ្នោត (គ.ជ.ប) បានចេញសេចក្តីសម្រេចនៅថ្ងៃទី១៩ ខែឧសភា ឆ្នាំ២០២៣ ដោយសម្រេចមិនអនុញ្ញាតឲ្យគណបក្សមហាសាមគ្គីជាតិខ្មែរ ចូលរួមប្រកួតប្រជែងក្នុងការបោះឆ្នោត ដោយសារគណបក្សនេះ គ្មានប្រកាសស្តីពីការចុះបញ្ជីគណបក្សនៅក្រសួងមហាផ្ទៃ ដែលមានបញ្ជាក់នីត្យានុកូលកម្មពីអាជ្ញាធរដែនដី។ 
 

គណបក្សមហាសាមគ្គីជាតិខ្មែរ ជួបរឿងដូចគណបក្សភ្លើងទៀនដែរ។ គណបក្សភ្លើងទៀន ត្រូវគ.ជ.ប មិនចុះឈ្មោះឲ្យចូលរួមប្រកួត ដោយសារខ្វះឯកសារនេះ។ គណបក្សភ្លើងទៀន ប្រកាសប្តឹងតវ៉ាទៅក្រុមប្រឹក្សាធម្មនុញ្ញ នៅថ្ងៃទី២០ ខែឧសភា។ 

 

គណបក្សមហាសាមគ្គីជាតិខ្មែរ ត្រូវបានក្រសួងមហាផ្ទៃ ទទួលស្គាល់ និងចុះឈ្មោះក្នុងបញ្ជីគណបក្ស តាំងពីឆ្នាំ២០១៧មក។ កាលពីបោះឆ្នោតជាតិឆ្នាំ២០១៨ គណបក្សនេះ ពុំបានចូលរួមប្រកួតនោះទេ៕