លោកស្រី Wandee Tosuwan បាននិយាយថា៖ «ព្រឹត្តិការណ៍កីឡាស៊ីហ្គេមលើកទី៣២ ពិតជារៀបចំបានល្អ។ ដូច្នេះហើយសម្រាប់កីឡាអាស៊ានប៉ារ៉ាហ្គេមលើកទី១២ ខ្ញុំគិតថានឹងធ្វើបានល្អដូចគ្នា»។ 
 

ថ្លែងប្រាប់សារព័ត៌មានថ្មីៗតាមសារអេឡិចត្រូនិក នៅថ្ងៃទី២១ ខែឧសភា ឆ្នាំ២០២៣  លោកស្រីអគ្គលេខាធិការ ក៏សង្ឃឹមថា ប្រព័ន្ធផ្សព្វផ្សាយក្នុងប្រទេសកម្ពុជា និងតំបន់អាស៊ាន នឹងបន្តផ្សព្វផ្សាយឱ្យបានទូលំទូលាយ។

 

លោកស្រី Wandee Tosuwan បន្ថែមថា៖ «ខ្ញុំសូមឱ្យមានការបញ្ចេញសារលើកទឹកចិត្តជូនទៅកាន់អត្តពលិកជនមានពិការភាព ចំពោះកីឡាករ-កីឡាការិនី ដែលអ្នកពេញចិត្ត ក្នុងការប្រកួតកីឡាអាស៊ានប៉ារ៉ាហ្គេមឆ្នាំ២០២៣»។ 

 

គួរបញ្ជាក់ថា ការប្រកួតកីឡាអាស៊ានប៉ារ៉ាហ្គេមលើកទី១២ ជាលើកដំបូងនៅកម្ពុជានេះ នឹងប្រព្រឹត្តទៅពីថ្ងៃទី៣-៩ ខែមិថុនា ឆ្នាំ២០២៣ នៅរាជធានីភ្នំពេញ ដោយមន្រ្តីប្រតិភូ គ្រូបង្វឹកកីឡាករ-កីឡាការិនី ជាង២០០០នាក់មកពីប្រណ្តាប្រទេសទាំង១០ ចូលរួម ។

 

កីឡាទាំង១៣ ប្រភេទរួមមាន៖ អត្តពលកម្ម, ប៊ូស្យា, វាយសី, បាល់ទាត់ ម្ខាង៧នាក់, អុកចក្រត្រង្គ, យូដូ, បាល់ទះអង្គុយ, បាល់បោះ អង្គុយលើរទេះ, លើកទម្ងន់, បាល់ទាត់ ម្ខាង៥នាក់, ហែលទឹក, វាយកូនឃ្លីលើតុ និងបាល់គប់ ម្ខាង៣នាក់។ ចំពោះកីឡាអេឡិចត្រូនិក(E-sport) ជាប្រភេទកីឡាបង្ហាញ តែមិនមានមេដាយឡើយ៕