លោកតា ឃឹម សុខុន ជាអ្នកអភិរក្សមួយរូប នៃអាជ្ញាធរជាតិអប្សរា ក្នុងខេត្តសៀមរាប។ មានវ័យ៧៦ឆ្នាំ លោកតាសុខន ទើបបានសម្រេចបំណងធំមួយរបស់ខ្លួន គឺការទៅទស្សនា រាជធានីភ្នំពេញ។ ជាលើកដំបូង ក្នុងជីវិតរបស់ខ្លួនដែលបានស្គាល់រាជធានី និងព្រះបារមរាជវាំង អ្នកភូមិគោកស្រុករូបនេះ និយាយប្រាប់ថា ខ្លួនពិតជាសប្បាយរីករាយ ដែលបានឃើញនូវអគារនានា ក្នុងរាជធានី ។ 
 

ដោយសារចង់បំពេញក្ដីស្រមៃទៅលេងរាជធានីនេះ លោកបានឆ្លៀតសម្រាកពីការងារជាអ្នកអភិរក្ស នៃអាជ្ញាធរជាតិអប្សរា ដើម្បីបានទៅឃើញភ្នំពេញ ព្រមទាំងចំណាយលុយផ្ទាល់ខ្លួនផងដែរ ជាមួយក្រុមគ្រួសារ និងអ្នកភូមិខ្លួន។ លោកតាក៏បានសរសើរពីភាពស្រស់ស្អាត ពីទិដ្ឋភាពផ្សេងៗ ដែលខ្លួនបានប្រទះនៅឯទីក្រុងទៀតផង។ 
 

រស់នៅ និងធ្វើការជាមួយប្រាសាទបុរាណ  តែលោកតាសុខុនថា គ្មានទីណាមួយ លើភពផែនដីនេះ អស្ចារ្យដូចប្រាសាទអង្គរវត្តនោះឡើយ បើទោះជាខ្លួនសរសើរពីភាពស្រស់ស្អាត នៅឯរាជធានីក៏ដោយ។ បន្ទាប់ពីបានទស្សនារាជធានីភ្នំពេញរួចមក អ្នកស្រុកប្រាសាទបាគងរូបនេះ មានបំណងប្រាថ្នាមួយទៀត​ គឺទៅដើរកម្សាន្តនៅឯសមុទ្រម្ដង៕