ពីក្រៅកិច្ចប្រជុំក្រុមប្រទេសអ្នកមានទាំង៧ (G7) នៅក្រុង Hiroshima ក្នុងថ្ងៃទី២១ ខែឧសភា លោក ចូកូ វីដូដូ ប្រធានាធិបតីឥណ្ឌូណេស៊ី បានជួបជាមួយសមភាគីអ៊ុយក្រែន លោក វ៉ូឡូឌីមៀ ហ្សេលេនស្គី ។

 

«ប្រធានាធិបតី ហ្សេលេនស្គី ខ្ញុំបានតាមដានស្ថានភាពអ៊ុយក្រែនយ៉ាងខ្លាំង។ ខ្ញុំសូមបង្ហាញក្តីរំលែកទុក្ខចំពោះជនរងគ្រោះដែលបន្តជួបបញ្ហា»។ លោក ចូកូ បានបញ្ជាក់បែបនេះ ដោយបន្តថា ឥណ្ឌូណេស៊ី ត្រៀមខ្លួនជាស្រេច ក្នុងការជួយរៀបចំសន្តិភាពរវាងរុស្ស៊ី និងអ៊ុយក្រែន។ នេះបើតាមសេចក្តីថ្លែងការណ៍របស់ប្រធានាធិបតីឥណ្ឌូណេស៊ី។ 

 

ជាការឆ្លើយតប លោក ហ្សេលេនស្គី បានបង្ហាញការពេញចិត្តចំពោះតួនាទីរបស់ឥណ្ឌូណេស៊ី ក្នុងការជួយស្វែងរកសន្តិភាពនៅអ៊ុយក្រែន។ 

 

បន្ថែមពីនេះ មេដឹកនាំទាំងពីរក៏បានពិភាក្សាពីការនាំចេញគ្រាប់ធញ្ញជាតិនៅសមុទ្រខ្មៅ ក៏ដូចជាជំនួយមនុស្សធម៌ផង។ ឥណ្ឌូណេស៊ី បានសន្យារៀបចំមន្ទីរពេទ្យមួយនៅអ៊ុយក្រែនឡើងវិញ ក្នុងពេលមានសង្រ្គាមបែបនេះ។ 

 

សូមបញ្ជាក់ថា វត្តមានរបស់លោក ហ្សេលេនស្គី នៅក្នុងកិច្ចប្រជុំមេដឹកនាំក្រុមប្រទេសអ្នកមានទាំង ៧ (G7) បានទទួលការសន្យាជាច្រើន ដើម្បីដាក់សម្ពាធលើរុស្ស៊ី ឱ្យបញ្ឈប់សង្រ្គាម ក៏ដូចជាដកទ័ពចេញពីអ៊ុយក្រែន៕