រដ្ឋមន្រ្តីការបរទេសអាម៉េរិក លោក អាន់តូនី ប្លីងខិន ដែលធ្វើទស្សនកិច្ចនៅប៉ាពូអាស៊ីនូវែលហ្គីណេជំនួសលោក ចូ បៃឌិន និងលោក Win Bakri Daki រដ្ឋមន្រ្តីការពារជាតិប៉ាពូអាស៊ីនូវែលហ្គីណេ បានចុះហត្ថលេខាលើកិច្ចព្រមព្រៀងមួយ ដែលអនុញ្ញាតឱ្យអាម៉េរិកចូលចតនាវា,​ ពង្រីកសមត្ថភាពលើការល្បាតសមុទ្រ ក៏ដូចជាចែករំលែកជំនាញបច្ចេកទេស។ 

 

«កិច្ចព្រមព្រៀងកិច្ចសហប្រតិបត្តិការការពារ ត្រូវបានចុះរួចហើយ»។​ នាយករដ្ឋមន្រ្តីប៉ាពូអាស៊ីនូវែលហ្គីណេ លោក  James Marape បានបញ្ជាក់បែបនេះ នៅក្នុងពិធីចុះហត្ថលេខា ក្នុងថ្ងៃទី២២ ខែឧសភា ដោយបន្តថា កិច្ចព្រមព្រៀងមួយនេះ នឹងជួយពង្រឹងទំនាក់ទំនងប្រទេសទាំងពីរបន្ថែមទៀត។ នេះបើតាមការចុះផ្សាយរបស់ទីភ្នាក់ងារព័ត៌មាន AFP។ 

 

ចំណែករដ្ឋមន្រ្តីការបរទេសអាម៉េរិក បានអះអាងថា កិច្ចព្រមព្រៀង ដែលលោកចាត់ទុកមានតម្លាភាព ត្រូវបានព្រាងក្នុងនាមជាដៃគូស្មើភាព និងអធិបតេយ្យ។ បន្ថែមពីនេះ លោកប្លីងខិន បានយល់ថា វានឹងជួយពង្រឹងសមត្ថភាពការពារប៉ាពូអាស៊ីនូវែលហ្គីណេលើការជំនួយមនុស្សធម៌ និងការឆ្លើយតបនឹងមហន្តរាយជាដើម។ 

 

នាយករដ្ឋមន្រ្តីប៉ាពូអាស៊ីនូវែលហ្គីណេ បានហៅកិច្ចព្រមព្រៀងខាងលើ នឹងជួយពន្លឿនសន្តិសុខសេដ្ឋកិច្ច ក៏ដូចជាសមត្ថភាពខ្លួនឱ្យដឹងពីអ្វីកើតឡើងក្នុងដែនទឹក និងជាអ្វីដែលមានធ្លាប់មានចាប់តាំងពីឆ្នាំ១៩៧៥មក។ 

 

កន្លងមក និស្សិតសកលវិទ្យាល័យមួយចំនួន ក៏បានតវ៉ាប្រឆាំងនឹងកិច្ចព្រមព្រៀងសហប្រតិបត្តិការការពារនេះដែរ ក្រោយហេតុផលវាអាចធ្វើឱ្យប៉ះពាល់ដល់ទំនាក់ទំនងជាមួយចិន ដែលជាដៃគូពាណិជ្ជកម្មដ៏សំខាន់មួយ។ យ៉ាងណាមិញ នាយករដ្ឋមន្រ្តីប៉ាពូអាស៊ីនូវែលហ្គីណេ បាននិយាយការពារថា កិច្ចព្រមព្រៀងខាងលើ ជាការពង្រីកកិច្ចសហប្រតិបត្តិការ ក្រោមកិច្ចព្រមព្រៀងដែលមានស្រាប់។ 

 

តាមការប្រកាសរបស់ក្រសួងការបរទេសអាម៉េរិក រដ្ឋាភិបាលក្រុងវ៉ាស៊ីនតោន នឹងផ្តលជំនួយ ៤៥លានដុល្លារ ទៅរដ្ឋាភិបាលព័រម៉ូរេសប៊ី ដោយក្នុងនោះមានរួមបញ្ចូលការផ្តល់ឧបករណ៍ដល់កម្លាំងប៉ាពូអាស៊ីនូវែលហ្គីណេ, ការដោះស្រាយបម្រែបម្រួលអាកាសធាតុ ជំងឺ និងឧក្រិដ្ឋកម្មឆ្លងព្រំដែនជាដើម៕