កុមារ កក្កដា ត្រូវបានមិត្តភក្ដិ​ឱ្យឈ្មោះថា អាស្វា ប្រហែលដោយសារកាយវិការក្រមិចក្រមើម ពិសេសភាពប៉ិនប្រសព្វ​ក្នុងការសម្ដែងជា តួអង្គហនុមានតែម្ដងក៏មិនដឹង។ សព្វថ្ងៃ កុមារា កក្កដា កំពុងហាត់រៀនសិល្បៈនៅក្លឹបបណ្ដុះបណ្ដាលវប្បធម៌ខ្មែរអង្គរ ស្ថិតនៅ​ភូមិចុងកៅស៊ូ សង្កាត់ស្លក្រាម ក្រុងសៀមរាប។

 

អ្នកស្រី យុគ សុភ័ក្រ្ត ត្រូវជាម្ដាយកុមារា កក្កដា ប្រាប់ថា កូនប្រុសទាំង៣របស់ខ្លួនសុទ្ធតែគាត់​ជំរុញឱ្យរៀនសិល្បៈ។ ចំពោះ កក្កដា ដែលជាកូនពៅ បានចូលរៀនតាំងពីអាយុ៤ឆ្នាំ ហើយបានរៀនសូត្រ​ផ្នែកនេះមួយឆ្នាំមក ហើយ។ ពួកគេរៀនសិល្បៈ ហាត់រាំ និងលេងភ្លេង នៅពេលសម្រាកពីការសិក្សា​នៅសាលារដ្ឋ។ 

 

អ្នកស្រី សុភ័ក្រ្ត ស្ញប់ស្ញែញ ដល់កូនប្រុសអ្នកស្រីជាខ្លាំង ដែលមានទេពកោសល្យហាត់រាំសិល្បៈ ទោះបីគេកើតចេញពីគ្រួសារដែលមិនមានឈាមជ័រជាអ្នកសិល្បៈបន្ដិចសោះក៏ដោយ។ អ្នកស្រី សុភ័ក្រ្ត រំលឹកថា ដើមឡើយការដែលជំរុញឱ្យ កក្កដា ហាត់រាំសិល្បៈបុរាណនេះ ដោយគ្រាន់តែចង់បញ្ជៀសគេ ឱ្យឆ្ងាយពីទូរសព្ទប៉ុណ្ណោះ ដោយគិតថា ការទុកគាត់នៅតែផ្ទះនិងចុចលេងទូរសព្ទច្រើន​នឹងផ្តល់ផល​មិនសូវល្អដល់កូន។ 

 

«មិនដឹងថាគាត់មានដុងយ៉ាងម៉េចទេ ខ្ញុំក៏ស្រឡាញ់សិល្បៈដែរ… ខ្ញុំសប្បាយចិត្ត មិននឹកស្មានតែគាត់រៀន​ឆ្លាតបានប៉ុណ្ណឹង និងអាចធ្វើបានប៉ុណ្ណឹងនៅក្មេងសោះ។ រៀនតាំងពីអាយុ៤ឆ្នាំ។ ទៅអនាគត​ចង់​​ឱ្យគាត់​ចេះឱ្យច្រើន និងមានចំណេះជំនាញច្បាស់លាស់»។

 

ចំពោះកុមារា កក្កដា វិញ បង្ហាញអារម្មណ៍រីករាយ នៅពេលបានឃើញរូបខ្លួនត្រូវបានគេបង្ហោះ និងមានពាក្យកោតសរសើរពីមហាជននៅតាមបណ្ដាញសង្គម។ កក្កដា ប្រាប់ថា នឹងរៀនសិល្បៈឱ្យបាន កាន់តែច្រើន និងពូកែ ដើម្បីសម្រេចបំណងឡើងឆាកសម្ដែងធំៗនាពេលអនាគត៕