«បើហ្វឹកហាត់នៅលើវិញ្ញាសា តែគ្មានឱកាសក្នុងការបង្ហាញសមត្ថភាពគឺស្មើនឹងអត់មានអ្វីទាំងអស់»។ លោក ហ៊ុន ម៉ានី អនុប្រធានប៉ារ៉ាឡាំពិកកម្ពុជា និយាយដូច្នេះ និងបានបញ្ជាក់ថាអត្តពលិកជនមានពិការភាពពិតណាស់គឺត្រូវការគាំទ្រជាងអ្នកមានសភាពធម្មតា។

 

 

ប្រធានសហភាពសហព័ន្ធយុវជនកម្ពុជា ដដែលបន្ថែមថា ព្រឹត្តិការណ៍កីឡាអាស៊ានប៉ារ៉ាហ្គេម គឺជាពេលមួយដែលអត្តពលិកជនមានពិការភាពអាចបង្ហាញនូវសមត្ថភាពដែលខ្លួនមាន ដែលសបញ្ជាក់ថា ពួកគាត់គឺមានសមត្ថភាព។ លោក ហ៊ុន ម៉ានី ក៏សង្ឃឹមជឿជាក់បងប្អូនប្រជាពលរដ្ឋខ្មែរចូលរួមគាំទ្រលើកទឹកចិត្តទៅដល់អត្តពលិកប៉ារ៉ាឡាំពិកទាំងអស់គ្នា ក្នុងព្រឹត្តិការណ៍ប៉ារ៉ាហ្គេមលើកទី១២ ដែលរៀបចំនៅទឹកដីកម្ពុជាផងដែរ។

 

គួបញ្ជាក់ថា ព្រឹត្តិការណ៍កីឡាអាស៊ានប៉ារ៉ាហ្គេមលើកទី១២ ឆ្នាំ២០២៣ នៅប្រទេសកម្ពុជា នឹងចាប់ផ្តើមពីថ្ងៃទី៣-៩ ខែមិថុនា ឆ្នាំ២០២៣ ដោយមានការប្រកួតលើ ១៣ប្រភេទកីឡារួមមាន៖ អត្តពលកម្ម, ប៊ូស្យា, វាយសី, បាល់ទាត់ ម្ខាង៧នាក់, អុកចក្រត្រង្គ, យូដូ, បាល់ទះអង្គុយ, បាល់បោះ អង្គុយលើរទេះ, លើកទម្ងន់, បាល់ទាត់ ម្ខាង៥នាក់, ហែលទឹក, វាយកូនឃ្លីលើតុ និងបាល់គប់ ម្ខាង៣នាក់។ ចំពោះកីឡាអេឡិចត្រូនិក(E-sport)ជាប្រភេទកីឡាបង្ហាញមិនមានមេដាយឡើយ៕