យោងតាមប្រព័ន្ធផ្សព្វផ្សាយន័រវេស នាវា USS Gerald Ford ដែល ដើរ​ដោយ​ថាមពលនុយក្លេអ៊ែរ ជាមួយប្រវែង៣៣៧ម៉ែត្រជាមួយនិងទម្ងន់១០ម៉ឺនតោន បានធ្វើដំណើរទៅកាន់តំបន់ Oslo Fjord ដែលជាកន្លែងឈប់ចតនៅជាច្រើនថ្ងៃមុនពេលធ្វើដំណើរទៅកាន់តំបន់អាក់ទិកដើម្បីចូលរួមសមយុទ្ធ​យោធាមួយ។

 

«ដំណើរទស្សនកិច្ច និងវត្តមានរបស់នាវាផ្ទុកយន្តហោះ ផ្តល់ឱកាសពិសេសមួយក្នុងការ អភិវឌ្ឍ​កិច្ចសហប្រតិបត្តិការរបស់យើង និងធ្វើការយ៉ាងជិតស្និទ្ធជាមួយសម្ព័ន្ធមិត្តដ៏សំខាន់ បំផុតរបស់យើង​គឺ​អាម៉េរិក»។ សេចក្តីថ្លែងការណ៍មួយរបស់យោធាន័រវេសបែបនេះ។ 

 

ប៉ុន្តែស្ថានទូត​រុស្ស៊ីបាន​រិះគន់​យ៉ាង​ខ្លាំងជុំវិញរឿងនេះ ខណៈដែលភាពតានតឹងរវាងបណ្ដាប្រ​ទេស​លោកខាងលិច និងរុស្ស៊ីលើសង្គ្រាមនៅអ៊ុយក្រែនកាន់តែកើនឡើង។

 

«វាគ្មានបញ្ហានៅភាគខាងជើងដែលទាមទារដំណោះស្រាយយោធា ឬបញ្ហាដែលទាមទារឱ្យមាន​អន្តរាគមន៍ពីខាងក្រៅនោះទេ»។ អ្នកនាំពាក្យស្ថានទូតរុស្ស៊ី លោក Timur Chekanov​ប្រាប់​ទីភ្នាក់ងារព័ត៌មាន AFP តាមអ៊ីមែលបែបនេះដោយសំដៅតំបន់ Scandinavia ហើយបន្តថា ដោយសារកន្លងមកទីក្រុងអូស្លូមើលមិនឃើញពីការគំរាមរបស់រុស្ស៊ី ការបង្ហាញ​កម្លាំងយោធាបែបនេះ​ហាក់​ដូច​ជា​ខុសទំនង និងបង្កគ្រោះថ្នាក់។

 

ន័រវេស ជាសម្ព័ន្ធយោធាណាតូមានព្រំដែនគោកជាមួយរុស្ស៊ីនៅភាគខាងជើងប្រទេស និងព្រំដែនស​មុទ្រនៅសមុទ្រ Barents។

 

យោងតាមកាសែត Barents Observer នាវាដឹកនាំយន្តហោះចម្បាំងអាម៉េរិក នឹងចូលរួមសមយុទ្ធ Arctic Challenge នៅថ្ងៃទី២៩ ខែឧសភា ដែលប្រមូលផ្តុំយន្តហោះចំនួន១៥០មកពីប្រទេស​លោក​ខាងលិចចំនួន១៤ ៕