លោកស្រី បណ្ឌិតសភាចារ្យ ភឿង សកុណា រដ្ឋមន្រ្តីក្រសួងវប្បធម៌ និងវិចិត្រសិល្បៈ បានចូលរួមក្នុងពិធីសម្ពោធ និងត្រៀមចាក់បញ្ចាំងភាពយន្តឯកសារ ដែលមានចំណងជើងថា «ការរស់ឡើងវិញនៃគុនល្បុក្កតោ» នៅរោងភាពយន្ត ឡេជេន ស៊ីណេមា សាខាអូឡាំព្យាម៉ល។ 

 

 

ការរស់ឡើងវិញនៃគុនល្បុក្កតោ គឺជារឿងពិត ដែលរៀបរាប់ពីដំណើររឿងដ៏អស្ចារ្យអំពីជ័យជម្នះ, ការបាត់បង់ , និងការរស់រានមានជីវិត ក៏ដូចជាការទាមទារអត្តសញ្ញាណវប្បធម៌ខ្មែរឡើងវិញ និងកសាងសម្ព័ន្ធភាពរពីជំនាន់មួយទៅជំនាន់មួយ។ វណ្ណកម្មដ៏ថ្មីសន្លាងនេះ បានចំណាយពេលថតជាង៥ឆ្នាំ ហើយបានពណ៌នា ពីដំណើរតស៊ូរបស់លោកគ្រូគុនល្បុក្កតោ សាន គឹមស៊ាន ដែលជាអ្នករស់រានមានជីវិតពីរបបប្រល័យពូជសាសន៍កម្ពុជា។  លោកតាក្រមាមាសរូបនេះ ក៏ជាអ្នកជួយឱ្យក្បាច់គុនបុរាណខ្មែរមួយនេះរស់ឡើងវិញ និងថែរក្សាការពារ សម្រាប់កូនខ្មែរជំនាន់ក្រោយផងដែរ។ 

 

គុនល្បុក្កតោបានប្រឈមនឹងការបាត់បង់ក្នុងសម័យខ្មែរក្រហម ដូចនឹងប្រពៃណីវប្បធម៌ជាច្រើនទៀតរបស់កម្ពុជាដែរ។ ប៉ុន្តែដោយសារតែការខិតខំប្រឹងប្រែងរបស់លោកគ្រូតា សាន គឹមស៊ាន  និងគ្រូមួយចំនួន ដែលនៅរស់រានមានជីវិតដល់សព្វថ្ងៃនេះ បានជំរុញគុនល្បុក្កតោឱ្យក្លាយជានិមិត្តរូបនៃមោទកភាពជាតិ និងកម្លាំងចិត្តរបស់ខ្មែរ។ ភាពយន្តឯកសារខាងលើ  បានសហការផលិតដោយ ផលិតកម្ម តេជៈ ភាពយន្ត រួមជាមួយផលិតកម្ម កងចក្រ ភីកឈ័រ និងផលិតកម្ម Cineboxx Film មកពីប្រទេសកាណាដា។ 

 

សូមបញ្ជាក់ថា ភាពយន្តឯកសាររឿង «ការរស់ឡើងវិញនៃគុនល្បុក្កតោ»  ចាក់បញ្ចាំងជាសាធារណៈ ចាប់ពីថ្ងៃទី២៥ ខែឧសភា ឆ្នាំ២០២៣ តទៅ នៅគ្រប់រោងភាពយន្ត៕