អន្តរជាតិ
កិច្ចប្រជុំរដ្ឋមន្រ្តីពាណិជ្ជកម្ម APEC មិនមានសេចក្តីថ្លែងការណ៍រួម ខណៈរុស្ស៊ីនិងចិនបដិសេធ តំណាងចរចាពាណិជ្ជកម្មអាម៉េរិក Katherine Tai ។ រូបថត AFP
× រដ្ឋមន្ត្រីពាណិជ្ជកម្មនៃកិច្ចសហប្រតិបត្តិការសេដ្ឋកិច្ចអាស៊ីប៉ាស៊ីហ្វិក (APEC) បានព្រមព្រៀងគ្នាជំរុញពាណិជ្ជកម្មដែលរួមបញ្ចូល និងនិរន្តរភាពបន្ថែមទៀត។ ប៉ុន្តែ APEC បរាជ័យក្នុងការតាក់តែងសេចក្តីថ្លែងការណ៍រួម ដោយសារតែការជំទាស់របស់រុស្ស៊ី និងចិនជុំវិញការលើកឡើងអំពីការឈ្លានពាននៅអ៊ុយក្រែន។
ក្រោយបិទកិច្ចចរចារយៈពេលពីរថ្ងៃនៅទីក្រុងទីក្រុង Detroit ដែលអាម៉េរិកជាម្ចាស់ផ្ទះ តំណាងពាណិជ្ជកម្មអាម៉េរិកលោកស្រី Katherine Tai បានចេញសេចក្តីថ្លែងការណ៍ប្រធានអង្គប្រជុំដែលសង្ខេបការពិភាក្សាដោយសង្កត់ធ្ងន់លើបរិយាប័ន្ន ការប្រយុទ្ធប្រឆាំងនឹងការប្រែប្រួល អាកាសធាតុ និងនិរន្តរភាព។ កិច្ចប្រជុំនេះគ្មានសេចក្ដីថ្លែងការណ៍រួមឡើយ។
«យើងបញ្ជាក់ឡើងវិញនូវការប្តេជ្ញាចិត្តរបស់យើងក្នុងការផ្តល់បរិយាកាសពាណិជ្ជកម្ម និងការ វិនិយោគដោយសេរី បើកចំហ យុត្តិធម៌ គ្មានការរើសអើង តម្លាភាព រួមបញ្ចូល និងអាចព្យាករបាន»។ សេចក្ដីថ្លែងការណ៍ខាងលើកឡើងបែបនេះ។
បណ្ដារដ្ឋមន្រ្តីពាណិជ្ជកម្ម APEC បានអះអាងជាថ្មីអំពីការប្តេជ្ញាចិត្តរបស់ខ្លួនចំពោះប្រព័ន្ធពាណិជ្ជកម្មពហុភាគីដែលមានមូលដ្ឋានលើច្បាប់ជាមួយអង្គការពាណិជ្ជកម្មពិភពលោកជាស្នូល។ APEC ក៏បន្ត ធ្វើការដើម្បីធានាឱ្យបានកម្រិតល្អមួយដើម្បីជំរុញបរិយាកាសពាណិជ្ជកម្ម និងការវិនិយោគដែលអំណោយផល ហើយបញ្ជាក់ឡើងវិញពីការប្តេជ្ញាចិត្តក្នុងការរក្សាទីផ្សារបើកចំហ និង ដើម្បីដោះស្រាយការរំខាននៃខ្សែច្រវាក់ផ្គត់ផ្គង់។
ក្រោមការជំទាស់របស់ចិន និងរុស្ស៊ី កិច្ចប្រជុំក៏មិនអាចចេញសេចក្ដីការណ៍រួមបាន។ ប្រទេសទាំងពីរបានកត់សម្គាល់ពីទស្សនៈខុសគ្នាក្នុងចំណោមសមាជិកលើបញ្ហាអ៊ុយក្រែន ហើយថា APEC មិនមែនជាវេទិកាដើម្បីដោះស្រាយបញ្ហាសន្តិសុខទេ។
លោកស្រី Tai បានប្រាប់សន្និសីទសារព័ត៌មានថា លោកស្រីសង្ឃឹមមេដឹកនាំ APEC នៅក្នុងកិច្ចប្រជុំកំពូលខែវិច្ឆិកានៅ San Francisco នឹងអាចបង្កើតសេចក្តីថ្លែងការណ៍រួមមួយ។ លោកស្រីក៏មានទំនុកចិត្តថា កេរ្តិ៍ឈ្មោះរបស់ APEC ក្នុងនាមជាស្ថាប័នបំផុសគំនិត និងជាកត្តាជំរុញកិច្ចសហប្រតិបត្តិការ ក៏អាចផ្តល់អត្ថប្រយោជន៍ដល់ការងាររបស់ពួកគេក្នុងការជំរុញការប្រណាំងឡើងដល់កំពូលសម្រាប់អ្នកធ្វើការនៅទូទាំងតំបន់៕
© រក្សាសិទ្ធិដោយ thmeythmey.com