ក្រុមហ៊ុន ជេនរ៉ល ថាយអ៊ឺរ ថកណឡជី (ខេមបូឌា) ដំណើរការរោងចក្រផលិតសំបកកង់រថយន្ត នៅតំបន់សេដ្ឋកិច្ចពិសេសក្រុងព្រះសីហនុ។ រោងចក្រនេះ ត្រូវការជ័រកៅស៊ូក្នុងស្រុកប្រមាណ ៥ពាន់តោនក្នុងមួយឆ្នាំ។ ការវិនិយោគថ្មីនេះ បានជួយលើកកម្ពស់ទីផ្សារជ័រកៅស៊ូរបស់កម្ពុជា ព្រមទាំងផ្ដល់ការងារដល់កម្មករដាំកៅស៊ូ និងរោងចក្រ ជាច្រើននាក់។ 

 

រោងចក្រនេះ គឺជាប្រភេទរោងចក្រដែលប្រើប្រាស់បច្ចេកវិទ្យាទំនើប ស្របទៅនឹងគោលនយោបាយអភិវឌ្ឍវិស័យឧស្សាហកម្មកម្ពុជា ដែលមានតម្លៃបន្ថែមខ្ពស់។ រោងចក្រនេះ មានលទ្ធភាពផលិតសំបកកង់ជិត ១,៣លានសំបកកង់ក្នុងមួយឆ្នាំ ដែលនឹងប្រើប្រាស់កម្មករនិយោជិតប្រមាណ ១ ១៥០នាក់។ 

 

ការវិនិយោគដ៏ធំនេះ ក៏បង្ហាញពីការជឿជាក់លើគោលនយោបាយរបស់រដ្ឋាភិបាលកម្ពុជា និងសក្ដានុពលនៃការអភិវឌ្ឍរីកចម្រើនយ៉ាងឆាប់រហ័សក្នុងរយៈពេល១៥ឆ្នាំ នៅតំបន់សេដ្ឋកិច្ចពិសេសក្រុងព្រះសីហនុ។ តាមរយៈការវិនិយោគរបស់រោងចក្រផលិតសំបកកង់នៅពេលនេះ រដ្ឋាភិបាលកម្ពុជា ជឿជាក់ថា នឹងមានក្រុមហ៊ុនផ្សេងៗទៀតបន្តមកវិនិយោគក្នុងវិស័យនេះបន្ថែមទៀត។

 

សូមជម្រាបថា គិតត្រឹមខែឧសភា ឆ្នាំ ២០២៣នេះ ខេត្តព្រះសីហនុ មានរោងចក្រសហគ្រាសចំនួន ៦១២កន្លែង និងកម្មករ និយោជិក ៧២៥៧នាក់ម៉ឺននាក់។ ក្នុងនោះ តំបន់សេដ្ឋកិច្ចពិសេសចំនួន ៣ កំពុងដំណើរការ រួមមាន តំបន់សេដ្ឋកិច្ចពិសេសក្រុងព្រះសីហនុ ,តំបន់សេដ្ឋកិច្ចពិសេសកំពង់ផែស្វយ័តក្រុងព្រះសីហនុ និង តំបន់សេដ្ឋកិច្ចពិសេសខេមបូឌាន  ចេជាង ហ្គ័រជី៕