អន្តរជាតិ
អ៊ុយក្រែនថា រុស្ស៊ីមានផែនការវាយប្រហារនៅរោងចក្រថាមពលនុយក្លេអ៊ែរ Zaporizhzhia
× ក្រសួងការពារជាតិអ៊ុយក្រែននាថ្ងៃទី២៦ ខែឧសភា បានចេញការជូនដំណឹងអំពីអ្វីដែលពួកគេអះអាងថា ជាផែនការរបស់រុស្ស៊ីក្នុងការក្លែងធ្វើឧប្បត្តិហេតុនៅរោងចក្រថាមពលនុយក្លេអ៊ែរ Zaporizhzhia ដែលកាន់កាប់ដោយរុស្ស៊ីផ្ទាល់។ ការវាយប្រហារនេះ ជាការប៉ុនប៉ងបញ្ឈប់ការវាយលុក របស់អ៊ុយក្រែនដែលមានគោលបំណងដណ្តើមយករោងចក្រនេះវិញ។
ក្នុងសេចក្តីថ្លែងការណ៍មួយ ក្រសួងការពារជាតិអ៊ុយក្រែនអះអាងថា ការលេចធ្លាយបន្ទាន់នៃសារធាតុវិទ្យុសកម្មនឹងត្រូវបានប្រកាសនៅក្នុងប៉ុន្មានម៉ោងខាងមុខនេះដែលកើតចេញពីការឧប្បត្តិហេតុនៅរោងចក្រថាមពលនុយក្លេអ៊ែរ Zaporizhia។
«កងកម្លាំងរុស្ស៊ី កំពុងរៀបចំការបង្កហេតុទ្រង់ទ្រាយធំដើម្បីបង្កើតជាចំណុចកណ្ដាលនៃគ្រោះថ្នាក់វិទ្យុសកម្ម»។ ឯកសារខាងលើលើកឡើងបែបនេះរួចបន្តថា កងកម្លាំងរុស្ស៊ីនឹងក្លែងធ្វើឧប្បត្តិហេតុនៅ Zaporizhia ដែលជារោងចក្រថាមពលនុយក្លេអ៊ែរដ៏ធំបំផុតនៅអឺរ៉ុប ហើយស្ថិតនៅក្រោមការគ្រប់គ្រងរបស់រុស្ស៊ីអស់រយៈពេលជាងមួយឆ្នាំមកនេះ។
ទន្ទឹមនេះ ដើម្បីលាក់បាំងសកម្មភាពរបស់ពួកគេតាម រុស្ស៊ីបានរំខានដល់ការប្តូរវេនបុគ្គលិកនៃបេសកកម្មត្រួតពិនិត្យអចិន្ត្រៃយ៍របស់ទីភ្នាក់ងារថាមពលបរមាណូអន្តរជាតិ (IAEA) ដែលគ្រោងធ្វើនៅថ្ងៃទី២៦ ខែឧសភា។ ក្រុងកៀវសង្កត់ធ្ងន់ថា គោលបំណងនៃសកម្មភាពនេះគឺដើម្បីញុះញង់សហគមន៍អន្តរជាតិឱ្យធ្វើការស៊ើបអង្កេតលម្អិត ដែលវានឹងបញ្ឈប់ផែនការរបស់អ៊ុយក្រែនក្នុងការវាយប្រហារយករោងចក្រនេះវិញផងដែរ។
សមាជិកសភាអ៊ុយក្រែន លោស្រី Inna Sovsun បានព្រមានថា ប្រតិបត្តិការដ៏គ្រោះថ្នាក់នេះ នឹងត្រូវបានក្លែងបន្លំជាការវាយប្រហារដោយអ៊ុយក្រែនក្នុងគោលបំណងបញ្ចេញវិទ្យុសកម្មដែលបង្កផលប៉ះពាល់ខ្ពស់។
ជាមួយអំពាវនាវទៅកាន់ប្រធាន IAEA លោក Rafael Grossi ឱ្យជួយអន្តរាគមន៍ លោកស្រីបញ្ជាក់ថា ពួកគេមិនអាចអនុញ្ញាតឱ្យរឿងនេះកើតឡើងបានទេ ហើយពួកគេត្រូវតែរួមគ្នាទប់ស្កាត់ការបង្កហេតុនុយក្លេអ៊ែរដ៏មហន្តរាយនេះ និងការពារតំបន់ Zaporizhzhia ពីការបំផ្លិចបំផ្លាញបន្ថែមទៀត៕
© រក្សាសិទ្ធិដោយ thmeythmey.com