លោក ជួន សៀង និងលោក សែប ថុន បានចាប់ផ្ដើមធ្វើការជាអ្នកថែសួនច្បារ​តាមដងផ្លូវ​នានាក្នុងក្រុងសៀមរាប និងជាអ្នកសម្អាតបរិស្ថាន នៅតាមមាត់ស្ទឹងសៀមរាបជាងមួយឆ្នាំហើយ។ នៅតាមបណ្តោយស្ទឹងសៀមរាប លោកទាំងពីរ មើលថែសួនច្បារចាប់​ពីចំណុចស្ពានអតីត​មន្ទីរទេសចរណ៍ ​រហូតដល់ស្ពានថ្មផ្សារចាស់។ 

 

លោកទាំងពីរនិយាយថា រៀងរាល់ថ្ងៃ ក្រុមអ្នកសម្អាតបរិស្ថានក្នុងក្រុងសៀមរាបជាច្រើននាក់ តែងតែចែកគោលដៅ​គ្នាដើម្បីសម្អាតទីក្រុងឱ្យមានសោភ័ណភាព។ លោក ជួន សៀង និងលោក សែប ថុន ជាអ្នកថែសួនច្បារ និងជាអ្នកសម្អាតបរិស្ថានតាមដងស្ទឹងសៀមរាប បានប្រាប់ឱ្យដឹងថា នៅរដូវវស្សាលោកទាំងពីរ ដើរកាត់ស្មៅ មែកឈើ និងសម្អាតតាមមាត់ស្ទឹង ឬជួនកាលត្រូវ​ទៅថែសួនច្បារ​តាមដងផ្លូវជាតិលេខ៦ ឬតាមដងផ្លូវនានាទាំង៣៨ខ្សែ។

 

ក្នុងបទសម្ភាសជាមួយសារព័ត៌មានថ្មីៗ អ្នកសម្អាតអនាម័យបរិស្ថានទាំងពីរខាងលើ បាននិយាយថា ផ្ទៃទឹកស្ទឹងសៀមរាប ដែលពោពេញទៅដោយកម្ទេចស្លឹកឈើផ្សេងៗ មានទាំងស្លែរ និងចកជាដើមនោះ គឺលោកចង់សម្អាតឱ្យអស់ខ្លាំងណាស់ ដើម្បីមើលទៅ ឃើញទឹកថ្លាស្រស់ស្អាត។ លោកពន្យល់ថា កម្លាំងសម្អាតមានចំនួនតិច ហើយកន្លែងដែល ត្រូវសម្អាតនោះមានច្រើន។ 

 

សម្រាប់លោក សែប ថុន គឺលោកចង់ឱ្យពលរដ្ឋទាំងអស់ រួមទាំងអ្នកលក់ដូរតាមដងស្ទឹង និងអ្នកមកអង្គុយលេង ជួយគិតគូរ និងថែរក្សាអនាម័យបរិស្ថានទាំងអស់គ្នា ទើបកន្លែងទាំងនោះអាចស្អាតបាន។

លោកបន្តថា៖«​ បរិស្ថានអាចស្អាតទៅបាន គឺចាប់ពីយើងទាំងអស់គ្នា បើសង្ឃឹមលើតែកម្មករ​ប៉ុន្មាន​នាក់​ហ្នឹង មិនអាចស្អាតបានទេ»។  បន្ថែមពីនេះលោក សែប ថុន បានសំនូមពរថាឱ្យ​អាជ្ញាធរពាក់ព័ន្ធជួយរកកម្មករមកបន្ថែមទៀតដើម្បីពន្លឿនការសម្អាតដងស្ទឹងសៀមរាបឱ្យមានសោភ័ណភាពស្រស់ស្អាតឡើងវិញ៕