អន្តរជាតិ
រុស្ស៊ី ប្រាប់អាម៉េរិកមិនបាច់បង្រៀនខ្លួនអំពីការដាក់ពង្រាយអាវុធនុយក្លេអ៊ែរទេ
× រុស្ស៊ី បានច្រានចោលការរិះគន់ពីប្រធានាធិបតីអាម៉េរិក ចូ បៃឌិន ជុំវិញការដាក់ពង្រាយអាវុធនុយក្លេអ៊ែរតាក់ទិចនៅបេឡារុស។ បើតាមរុស្ស៊ី ទីក្រុងវ៉ាស៊ីនតោនផ្ទាល់បានដាក់ពង្រាយអាវុធនុយក្លេអ៊ែរជាច្រើនទសវត្សរ៍មកហើយនៅទ្វីបអឺរ៉ុប។
ក្រុងមូស្កូនៅថ្ងៃទី ២៥ ខែឧសភា បានប្រកាសពីការអនុវត្តផែនការដាក់ពង្រាយអាវុធនុយក្លេអ៊ែរតាក់ទិចជាលើកដំបូងនៅខាងក្រៅព្រំដែនរបស់ខ្លួនទៅកាន់បេឡារុសចាប់តាំងពីការដួលរលំនៃសហភាពសូវៀតឆ្នាំ១៩៩១។ ប្រធានាធិបតីបេឡារុស Alexander Lukashenko ក៏បានបញ្ជាក់ពីការដឹកជញ្ជូននេះដែរ។
អាម៉េរិក បានប្រតិកម្មយ៉ាងខ្លាំងនឹងការដាក់ពង្រាយនេះម្ដងហើយទៀត។ ចុងក្រោយប្រធានាធិបតី ចូ បៃឌិន ក៏ហៅទង្វើរបស់រុស្ស៊ី ជាការឈានទៅមុខនឹងផែនការដាក់ពង្រាយអាវុធនុយក្លេអ៊ែរតាក់ទិចរបស់ខ្លួន។
តបនឹងការរិះគន់ចុងក្រោយនេះ ស្ថានទូតរុស្ស៊ីប្រចាំវ៉ាស៊ីនតោននិយាយថា វាជាសិទ្ធិអធិបតេយ្យភាព របស់រុស្ស៊ី និងបេឡារុសក្នុងការធានាសន្តិសុខតាមរយៈមធ្យោបាយដែលចាំបាច់ចំពេលប្រឈមមុខសង្រ្គាមបង្កកើតឡើងដោយទីក្រុងវ៉ាស៊ីនតោន។
«អាម៉េរិកអនុវត្តអស់រយៈពេលជាច្រើនទសវត្សរ៍មកហើយក្នុងការរក្សាឃ្លាំងអាវុធនុយក្លេអ៊ែរដ៏ធំរបស់ខ្លួននៅអឺរ៉ុប»។ សេចក្ដីថ្លែងការណ៍របស់ស្ថានទូតរុស្ស៊ីបញ្ជាក់បែបនេះ រួចបន្តថា អាម៉េរិកជាមួយសម្ព័ន្ធយោធាណាតូក៏បានចូលរួមក្នុងការចែករំលែកអាវុធនុយក្លេអ៊ែរជាមួយគ្នាដើម្បីប្រើប្រាស់ប្រឆាំងរុស្ស៊ី។
បើតាមសេចក្ដីថ្លែងការណ៍ដដែល អ្វីដែលរុស្ស៊ីបានស្របជាមួយនឹងកាតព្វកិច្ចផ្លូវច្បាប់របស់ខ្លួន។
សូមបញ្ជាក់ថា អាម៉េរិកបានដាក់ពង្រាយអាវុធនុយក្លេអ៊ែរនៅអឺរ៉ុបខាងលិចចាប់តាំងពីសម័យប្រធានាធិបតី Dwight D Eisenhower ជាការប្រឆាំងនឹងការគំរាមកំហែងរបស់សហភាពសូវៀត។ អាវុធនុយក្លេអ៊ែរដំបូងរបស់អាម៉េរិកនៅអឺរ៉ុបត្រូវបានដាក់ពង្រាយនៅចក្រភពអង់គ្លេសក្នុងឆ្នាំ១៩៥៤ ។
បើតាមរបាយការណ៍នានា អាម៉េរិកមានអាវុធនុយក្លេអ៊ែរកម្រិត B61 ចំនួន១០០គ្រាប់ ដែលត្រូវបានដាក់ពង្រាយនៅអឺរ៉ុបដែលក្នុងនោះមាននៅអ៊ីតាលី អាល្លឺម៉ង់ តួកគី បែលហ្ស៊ិក និងហូឡង់៕
© រក្សាសិទ្ធិដោយ thmeythmey.com