ទីភ្នាក់ងារព័ត៌មានរដ្ឋកូរ៉េខាងជើង (KCNA) នាថ្ងៃទី៣១ ខែឧសភា បានរាយការណ៍ពីការបាញ់ផ្កាយរណបយោធារបស់ខ្លួនដែលមិនជោគជ័យ។ រ៉ុក្កែត Chollima-1 ដែលបំពាក់ផ្កាយរណបយោធា Malligyong-1 បានបរាជ័យដោយសារតែអស្ថិរភាពនៅក្នុងម៉ាស៊ីន និងប្រព័ន្ធប្រេងឥន្ធនៈនៅពេលចាប់ផ្ដើមដំណាក់កាលទី២។ 

 

នេះជាការប៉ុនប៉ងបាញ់លើកទីប្រាំមួយរបស់កូរ៉េខាងជើង និងជាលើកដំបូងចាប់តាំងពីឆ្នាំ២០១៦។ វាក៏ជាការបាញ់បង្ហោះផ្កាយរណបចារកម្មយោធាលើកដំបូងរបស់កូរ៉េខាងជើងដែរ។ បើតាមយោធាកូរ៉េខាងត្បូង កូរ៉េខាងជើងបាញ់រ៉ុក្កែតចេញពី Tongchang-ri នៅឆ្នេរខាងលិចប្រទេសនេះនៅម៉ោង៦កន្លះ។ ជាមួយគ្នានេះ កូរ៉េខាងត្បូងក៏បានប្រមូលសំណល់រ៉ុក្កែតនេះដើម្បីស្រាវជ្រាវបន្ត សំដៅយល់ដឹងពីសមត្ថភាពរបស់រដ្ឋកុម្មុយនីស្តមួយនេះ។

 

នៅកូរ៉េខាងត្បូង និងជប៉ុន អាជ្ញាធរក៏បានប្រកាសអាសន្នឱ្យប្រជាជនរកកន្លែងសុវត្ថិភាព ហើយក៏លុបចោលវិញនៅពេលបន្ទាប់ ក្រោយគ្មានគ្រោះថ្នាក់ណាមួយ។

 

ភ្លាមក្រោយការបាញ់បង្ហោះនេះដែរ កូរ៉េខាងត្បូង ក៏ថ្កោលទោសភ្លាមដែរដោយចាត់ទុកជាការរំលោភ​យ៉ាងធ្ងន់ធ្ងរលើដំណោះស្រាយរបស់ក្រុមប្រឹក្សាសន្តិសុខអង្គការសហប្រជាជាតិ និងជា​ការ​បង្ក​ហេតុ​ដ៏​ធ្ងន់ធ្ងរដែលគំរាមកំហែងដល់សន្តិភាពនៅលើឧបទ្វីបកូរ៉េ និងតំបន់នេះទៀតផង។

 

ស្រដៀងគ្នានេះ អ្នកនាំពាក្យក្រុមប្រឹក្សាសន្តិសុខជាតិអាម៉េរិក Adam Hodge ហៅការបាញ់រ៉ុក្កែតនេះ ជាការបង្កើនភាពតានតឹង និងហានិភ័យដែលធ្វើឱ្យមានអស្ថិរភាពដល់ស្ថានភាពសន្តិសុខក្នុងតំបន់ និង​ពិភពលោក។ លោក Hodge បញ្ជាក់ថា អាម៉េរិក នឹងបន្តឈរការពារសម្ព័ន្ធមិត្តកូរ៉េខាងត្បូង និង​ជប៉ុន​ផងដែរ៕