លោក សាយ បូរី ដែលទទួលបានបណ្ឌិតច្បាប់ជំនាញខាងវិទ្យាសាស្ត្ររដ្ឋបាលពីបារាំងនៅឆ្នាំ១៩៧៤ បានអះអាងថា ក្នុងប្រវត្តិសាស្ត្រកម្ពុជា លោកទើបតែឃើញមានសម្តេច ហ៊ុន សែន ម្នាក់គត់ ដែលឆ្នើមក្នុងទស្សនវិជ្ជានយោបាយ និងរដ្ឋបាលសាធារណៈ។

 

«ពួកសត្រូវ ខំពន្លិច ឬបន្ថោកលោកយ៉ាងណា ក៏ការពិតនៅតែជាការពិត។ បញ្ញវន្តខ្មែរគួរតែសិក្សាស្រាវជ្រាវអំពីមនោគមវិជ្ជានយោបាយរបស់លោក សម្រាប់បង្រៀនផងដែរ»។ នេះជាការលើកឡើងរបស់លោក សាយ បូរី ដែលធ្លាប់ធ្វើជាមន្ត្រីជាន់ខ្ពស់ក្នុងក្របខណ្ឌក្រសួងមហាផ្ទៃនាឆ្នាំ១៩៦៥, ធ្វើជារដ្ឋមន្ត្រី និងរដ្ឋលេខាធិការ ទំនាក់ទំនងជាមួយរដ្ឋសភា (ឆ្នាំ១៩៩៣-១៩៩៥)។

 

លោកបានកត់សម្គាល់ថា៖ «យើងសព្វថ្ងៃស្គាល់តែអ្នកប្រាជ្ញបរទេស មិនដឹងថាយើងមានអ្នកប្រាជ្ញរបស់ខ្លួនដែរ។ កម្ពុជាមានភ័ព្វសំណាងធំក្រៃលែងដែលមានអ្នកប្រាជ្ញក្នុងតួអង្គសម្តេចតេជា។ លោកជាមោទនភាពជាតិខ្មែរ ហើយចំណុចនេះ ក៏គួរក្លាយជាកត្តានៃការបង្រួបបង្រួមជាតិដ៏សំខាន់មួយដែរ»។

 

ក្រៅពីតួនាទីជាសាស្ត្រាចារ្យតាមមហាវិទ្យាល័យ លោក សាយ បូរី ធ្លាប់ធ្វើជាប្រធានគណៈមេធាវីកម្ពុជា (១៩៩៥-១៩៩៨), សមាជិកក្រុមប្រឹក្សាធម្មនុញ្ញ, អតីតទីប្រឹក្សាផ្ទាល់របស់ព្រះបរមរតនកោដ្ឋ និងជាអតីតទីប្រឹក្សាច្បាប់របស់លោក កឹម សុខា ក្នុងក្របខណ្ឌអនុប្រធានទី១នៃរដ្ឋសភាជាតិ។

 

ស្នាដៃសៀវភៅដ៏ល្បីល្បាញរបស់លោក សាយ បូរី គឺ «នីតិរដ្ឋបាលសាធារណៈ» ជាភាសាខ្មែរ ដែលត្រូវបានបោះពុម្ពជាច្រើនលើក ចាប់តាំងពីឆ្នាំ២០០១ មក៕