ក្នុងកិច្ចប្រជុំក្រុម BRICS ដែលមានប្រេស៊ីល រុស្ស៊ី ឥណ្ឌា ចិន និងអាហ្វ្រិកខាងត្បូង នាថ្ងៃទី១ ខែមិថុនា នៅទីក្រុង Cape Town រដ្ឋមន្ត្រីការបរទេសទាំង៥ប្រទេស​សង្កត់ធ្ងន់លើការយកចិត្តទុកដាក់​កសាង​ឥទ្ធិពលរបស់ប្លុកនេះនៅក្នុងប្រព័ន្ធពហុប៉ូល និងប្រជែងអំណាចរបស់លោកខាងលិច។

 

រដ្ឋមន្ត្រីការបរទេសឥណ្ឌា Subrahmanyam Jaishankar បានលើកឡើងថា ប្រទេស​ជាច្រើន​នៅតែ​ជួបភាពលំបាកខណៈជំនួយមានតិចពេក។ លោកក៏និយាយដល់តម្រូវការដើម្បីធ្វើកំណែទម្រង់ការ​សម្រេចចិត្តជាសកលរួមទាំងដោយក្រុមប្រឹក្សាសន្តិសុខអង្គការសហប្រជាជាតិផងដែរ។

 

«វិធីចាស់មិនអាចដោះស្រាយស្ថានភាពថ្មីបានទេ។ យើងជានិមិត្តសញ្ញានៃការផ្លាស់ប្តូរ។ យើងត្រូវតែ ចាប់ផ្ដើមសកម្មភាព»។ លោក Jaishankar បានលើកឡើងបែបនេះ។

 

ទន្ទឹមនេះ សំណួរទាក់ទងនឹងដីកាចាប់ខ្លួនប្រធានាធិបតី វ៉្លាឌីមៀ ពូទីន ក៏នៅតែជាប្រធានបទសំខា​ន់​ទោះបីជាកាលពីចុងខែឧសភា អាហ្រ្វិកខាងត្បូងបានចេញអភ័យឯកសិទ្ធិកា​រទូតដល់​មេដឹកនាំ​ទាំងអស់ដែលចូលរួមក្នុងកិច្ចប្រជុំកំពូលនៅទីក្រុង Johannesburg ក៏ដោយ។ 

 

ក្នុងសន្និសីទសារព័ត៌មានក្រោយកិច្ចប្រជុំ រដ្ឋមន្ត្រីការបរទេសអាហ្រ្វិកខាងត្បូងលោកស្រី Naledi Pandor បាននិយាយថា អាហ្វ្រិកដែលជាសមាជិក ICC កំពុងពិចារណាជម្រើសចំពោះលោក ពូទីន ដែលជាកម្មវត្ថុនៃដីកាចាប់ខ្លួនឧក្រិដ្ឋកម្មសង្គ្រាមដែលចេញដោយ ICC។

 

«ចម្លើយគឺប្រធានាធិបតីលោក Cyril Ramaphosa នឹងបង្ហាញថាអ្វីជាជំហរចុងក្រោយរបស់​អាហ្វ្រិក​ខាងត្បូង»។ លោកស្រីលើកឡើងបែបនេះរួចបន្តថា ការអញ្ជើញត្រូវបានបញ្ជូនដល់ប្រមុខរ​ដ្ឋ​ទាំង​អស់​នៃក្រុម BRICS រួចហើយ។ 

 

គួរបញ្ជាក់ថា តុលាការ ICC បានចោទប្រកាន់លោក ពូទីន កាលពីខែមីនាពីបទឧក្រិដ្ឋកម្ម សង្រ្គាមជុំវិញការជម្លៀសកុមារចេញពីទឹកដីអ៊ុយក្រែនដែលរុស្ស៊ីបានដណ្ដើមកាន់កាប់។ យ៉ាងណាមិញ ទីក្រុងមូស្គូ​បដិសេធការចោទប្រកាន់នេះ។ ប៉ុន្តែមកទល់ពេលនេះ លោក ពូទីន មិនបានបញ្ជាក់ពីការចូលរួមជំនួបនេះនៅឡើយ ឯវិមានក្រេមឡាំងបញ្ជាក់ថា រុស្ស៊ីនឹងចូលរួមក្នុងកម្រិតត្រឹមត្រូវមួយ៕