កីឡាជាតិ
ជាតិ
ខ្សែបម្រើហ្គីណេ Barry របស់ណាហ្គាខប ញ៉ាំចេកដើម្បីបង្ហាញការគាំទ្រដល់ Dani Alves
× ខ្សែបម្រើសញ្ជាតិហ្គីណេ Barry Lelouma ដែលកំពុងលេងឲ្យក្លិបណាហ្គាខប បានបង្ហោះរូបញ៉ាំចេកនៅលើគណនីហ្វេសប៊ុករបស់ខ្លួនដើម្បីបង្ហាញការគាំទ្រដល់ខ្សែការពារស្តាំ Dani Alves នៃក្លិប Barcelona ដែលត្រូវបានអ្នកគាំទ្រម្នាក់គប់ចេក នាអំឡុងនៃការប្រកួតជាមួយ Villarreal កាលពីថ្ងៃទី២៧ ខែមេសា កន្លងមក។
ករណីរើសអើងជាតិសាសន៍នេះ មិនបានធ្វើឲ្យកីឡាករសញ្ជាតិប្រេស៊ីល Alves ខឹងសម្បារឡើយ ដោយរូបគេដើរទៅរើស ហើយបកចេកនោះញាំ មុននឹងទាត់បាល់ចេញពីជ្រុង។ ទង្វើរបស់ Alves ទទួលបាននូវការកោតសរសើរជាខ្លាំង ហើយកីឡាករកំពូលៗនៅលើពិភពលោក បានបង្ហាញនូវការគាំទ្រដល់ Alves។
ភ្លាមៗ គេសង្កេតឃើញ ខ្សែប្រយុទ្ធ Neymar មិត្តរួមក្លិប និងរួមសញ្ជាតិរបស់ Alves បានបង្ហោះរូបកាន់ចេកនៅក្នុងបណ្តាញសង្គម Instagram របស់ខ្លួន ដោយសរសេរថា «ពួកយើងទាំងអស់គ្នាគឺជាសត្វស្វា»។ បន្ទាប់មកមានកីឡាករជាច្រើនទៀតដែលបង្ហោះរូបខ្លួន ជាមួយផ្លែចេកដែលក្នុងនោះមានដូចជា David Luiz, Oscar, Sergio Aguero, Luis Suarez, Philippe Coutinho និង Moussa Dembele ជាដើម។
កីឡាករ Barry អាយុ១៩ឆ្នាំ បាននិយាយប្រាប់គេហទំព័រថ្មីៗថា រូបគេដែលមានស្បែកខ្មៅផងដែរនោះ ត្រូវតែបង្ហាញពីការគាំទ្រដល់ Alves។ ខ្សែបម្រើណាហ្គាខបរូបនេះ បានលើកឡើងថា ការរើសអើងមិនគួរកើតមានឡើយនៅក្នុងសតវត្សរ៍ទី២១នេះ៕
© រក្សាសិទ្ធិដោយ thmeythmey.com